દિલ્હીની ચૂંટણી પહેલા કોંગ્રેસનો માસ્ટરસ્ટ્રોક, આ 5 ગેરંટી સાથે મહિલાઓ અને યુવાનો પર નજર
Updated: Jan 4th, 2025
Five major guarantees of Congress in Delhi Elections: દિલ્હી વિધાનસભા ચૂંટણી 2025ની તૈયારીઓ પૂરજોશમાં ચાલી રહી છે અને કોંગ્રેસ પાર્ટી તેના ચૂંટણી વચનો અને સત્તામાં પાછા ફરવાની યોજનાઓ સાથે સંપૂર્ણ રીતે તૈયાર છે. આગામી ચૂંટણીમાં દિલ્હીના લોકોને પાંચ મોટી ગેરંટી આપવાની જાહેરાત કોંગ્રેસે કરી છે. રાહુલ ગાંધી, મલ્લિકાર્જુન ખડગે, પ્રિયંકા ગાંધી અને અન્ય વરિષ્ઠ નેતાઓ સહિતની કોંગ્રેસ પાર્ટી 6 જાન્યુઆરીથી 12 જાન્યુઆરી સુધી આ ગેરંટીની જાહેરાત કરશે. આ ગેરંટી દિલ્હીમાં ચૂંટણી સ્પર્ધાને રસપ્રદ બનાવશે.
1. મહિલાઓ માટે ડાયરેક્ટ બેનિફિટ ટ્રાન્સફર (DBT) યોજના
મહિલા મતદારો પણ કોંગ્રેસના ફોકસમાં છે. જો તેઓ દિલ્હી ચૂંટણી જીતશે તો પાર્ટી મહિલાઓને દર મહિને રૂ. 2500-3000 આપવાનું વચન આપવા જઈ રહી છે.
2. સ્વાસ્થ્ય વીમા યોજના
દિલ્હીમાં પણ કોંગ્રેસ બધા માટે સ્વાસ્થ્ય વીમા અંગે મોટું વચન આપશે. જો કે, યોજનાના લાભ અંગે કેટલીક શરતોનો સમાવેશ કરવામાં આવે તેવી શક્યતા છે.
3. યુવાનોને નોકરીની ગેરંટી
કોંગ્રેસ પ્રથમ વખત બેરોજગાર મતદારોને રીઝવવા માટે મોટો જુગાર રમવા જઈ રહી છે. પાર્ટી બેરોજગાર યુવાનો માટે એપ્રેન્ટિસશીપ સ્કીમની જાહેરાત કરી શકે છે.
4. લેબર ક્લાસ માટે ઈન્કમ ગેરંટી
જો કોંગ્રેસ ચૂંટણી જીતે તો લેબર ક્લાસ ઈન્કમ ગેરંટી સ્કીમની પણ જાહેરાત કરી શકે છે.
5. બધા માટે રાશન
કોંગ્રેસ શહેરી ગરીબો માટે મોટી જાહેરાત કરવા જઈ રહી છે. પાર્ટી AAPમાંથી તેની પરંપરાગત વોટ બેંક પાછી મેળવવા માટે બધા માટે રાશન આપવા પર વિચાર કરી રહી છે.
આ ઉપરાંત કોંગ્રેસ વિધાનસભાની ચૂંટણી પહેલા પોતાની ગેરંટીની વિશ્વસનીયતા ઉભી કરવા માટે વાતાવરણ તૈયાર કરી રહી છે.
દિલ્હીમાં કુલ 70 બેઠકો છે. દિલ્હીમાં આમ આદમી પાર્ટીની સરકાર છે અને આતિશી મુખ્યમંત્રી છે. રાષ્ટ્રીય રાજધાનીમાં AAP 10 વર્ષથી સત્તામાં છે. આ પહેલા 15 વર્ષ સુધી રાજ્યમાં કોંગ્રેસની સરકાર હતી. વર્ષ 1993માં ભાજપે પહેલીવાર દિલ્હી વિધાનસભાની ચૂંટણી જીતી હતી.
