ટેક્સી પરમિટથી ગાયનું છાણ ખરીદવાના વચનો...હિમાચલ ચૂંટણી માટે કોંગ્રેસે જાહેર કર્યો ઘોષણાપત્ર

ખેડૂતો પાસેથી ગાયનું છાણ ખરીદશે કોંગ્રેસ સરકાર,લંબાવવામાં આવશે ટેક્સી પરમિટ: કોંગ્રેસ સરકાર

અમદાવાદ, તા. 05

હિમાચલ પ્રદેશની ચૂંટણીમાં હવે ગણતરીના દિવસો જ બાકી છે. રાજ્યમાં ચૂંટણી પ્રચાર ચાલી રહ્યો છે. તમામ દિગ્ગજ નેતાઓ પોતપોતાના પક્ષના પ્રચારમાં વ્યસ્ત છે. આ દરમિયાન કોંગ્રેસે આજે પોતાનો ઘોષણાપત્ર જાહેર કર્યો છે. કોંગ્રેસે પોતાના ઘોષણાપત્રમાં જનતાને અનેક વચનો આપ્યા છે.

કોંગ્રેસે તેના ઘોષણાપત્રમાં લોકોને 10 ગેરંટી આપવાનું વચન આપ્યું છે. જેમાં OPSનો અમલ, મહિલાઓને દર મહિને રૂ. 1,500, મફત વીજળીના 300 યુનિટ અને રૂ. 2 પ્રતિ કિલોના દરે ગાયના છાણની ખરીદીનો સમાવેશ થાય છે.  જો રાજ્યમાં તેમની સરકાર આવશે, તો કેબિનેટની પ્રથમ બેઠકમાં એક લાખ સરકારી નોકરી આપવાનો નિર્ણય લેવામાં આવશે.

વધુમાં કોંગ્રેસે વચન આપ્યું છે કે રાજકીય આધાર પર કર્મચારીઓને હેરાન કરવા માટે જયરામ સરકાર દ્વારા કરવામાં આવેલી તમામ બદલીઓ રદ કરવામાં આવશે. કોંગ્રેસ સરકાર ગ્રામ્ય માર્ગો માટે જમીન સંપાદન કાયદાનો અમલ કરીને જમીન માલિકોને ચાર ગણું વળતર આપવાની જોગવાઈ કરશે.આ સાથે કોંગ્રેસ સરકાર કૃષિ અને બાગાયત આયોગની રચના કરશે, જેમાં ખેડૂતો અને માળીઓને પૂરતું પ્રતિનિધિત્વ આપવામાં આવશે. ખેડૂતો અને માળીઓ સાથે પરામર્શ કરીને આ કમિશન ફળોના ભાવ નક્કી કરશે. કમિશનની સલાહ પર, સફરજનની દરેક શ્રેણી માટે લઘુત્તમ ટેકાના ભાવ જાહેર કરવામાં આવશે. આનાથી ઓછી કિંમતે સફરજન ખરીદવા પર કોઈપણને પ્રતિબંધ મૂકવામાં આવશે, પછી ભલે તે અદાણીની કંપની હોય.

સોલન જિલ્લામાં ફૂડ પ્રોસેસિંગ પાર્ક બનાવવામાં આવશે. કોંગ્રેસે જાહેરાત કરી છે કે, સરકાર દ્વારા દરેક પશુપાલક પાસેથી દરરોજ દસ કિલો દૂધ ખરીદવામાં આવશે. આ સાથે પશુપાલકો પાસેથી બે રૂપિયા પ્રતિ કિલોના ભાવે ગાયનું છાણ ખરીદવામાં આવશે. આ ગાયના છાણને વર્મી કમ્પોસ્ટમાં રૂપાંતરિત કરવા માટે પંચાયત કક્ષાએ વ્યવસ્થા કરવામાં આવશે. પશુ આહાર માટે વિશેષ ગ્રાન્ટ આપવામાં આવશે. ઘર દીઠ 4 ગાય સુધીની ખરીદી પર સબસિડી આપવામાં આવશે. નવી પ્રવાસન નીતિ બનાવીને ગામડાઓમાં પ્રવાસનને પ્રોત્સાહન આપવા સ્માર્ટ વિલેજ પ્રોજેક્ટ શરૂ કરવામાં આવશે. આ ગામોમાં પર્યટનની આધુનિક સુવિધાઓ વિકસાવવામાં આવશે.

ટેક્સી પરમિટની મુદત 10 થી 15 વર્ષ સુધી બદલાશે. દેવભૂમિ વિકાસ ફંડ હેઠળ ધારાસભ્યોને પ્રવાસન દૃષ્ટિકોણથી ધાર્મિક સ્થળોનો વિકાસ કરવા અને માળખાકીય વિકાસ માટે બજેટ ફાળવવામાં આવશે.મનરેગાની તર્જ પર શહેરી આજીવિકા યોજના લાગુ કરવામાં આવશે. મનરેગાની જેમ તેને પણ કાયદો બનાવવામાં આવશે અને શહેરી બેરોજગારોને કામ માંગવાનો અધિકાર મળશે.

તમામ મ્યુનિસિપલ કોર્પોરેશનોમાં ત્રણ મોટા પાર્ક વિકસાવવામાં આવશે, જેમાં વેક-અપ ટ્રેક અને આઉટડોર જિમ સાધનો હશે. હિમાચલ પ્રદેશમાં નવી પ્રવાસન નીતિ લાવવામાં આવશે. તમને જણાવી દઈએ કે મેનિફેસ્ટોની જાહેરાત સમયે છત્તીસગઢના મુખ્યમંત્રી ભૂપેશ બઘેલ, રાજ્યસભા સાંસદ રાજીવ શુક્લા અને મેનિફેસ્ટો કમિટીના પ્રમુખ ધની રામ શાંડિલ, પ્રદેશ અધ્યક્ષ અને સાંસદ પ્રતિભા સિંહ હાજર હતા.