મોદી સરકારે માલદીવને બજેટમાં આપ્યો ઝટકો, ગત વર્ષ કરતા 171 કરોડ ઓછા ફાળવ્યા

Budget 2024 : નણામંત્રી નિર્મલા સીતારમણે 2024-25નું વચગાળાનું બજેટ રજૂ કર્યું છે. આ બજેટથી કેન્દ્ર સરકારે માલદીવને જોરદાર ઝટકો આપ્યો છે. ભારતે તેના પાડોશી દેશ માલદીવ માટે ગયા વર્ષની સરખામણીમાં બજેટમાં ઓછી રકમ ફાળવવામાં આવી છે. ઉલ્લેખનીય છે કે માલદીવ માટે 2023-24ના બજેટમાં 771 કરોડ રૂપિયા ફાળવવામાં આવ્યા હતા. જ્યારે આ બજેટમાં કુલ 171 કરોડ ઓછા ફાળવ્યા છે.

ભારતમાંથી માલદીવ જનારા પ્રવાસીઓની સંખ્યામાં ઘટાડો થયો

નાણામંત્રી નિર્મલા સીતારમણના જણાવ્યા અનુસાર, 2024-25માં માલદીવ માટે 600 કરોડ રૂપિયાના બજેટનો અંદાજ રાખવામાં આવ્યો છે. કોઈપણ દેશ માટે બજેટમાં ફાળવવામાં આવેલી રકમ તેની આયાત અને નિકાસ પર ખર્ચવામાં આવે છે. વ્યવસાયિક વ્યવહારો ઉપરાંત, આ રકમ અન્ય દેશો સાથે લશ્કરી ટેક્નોલોજીના આદાનપ્રદાન માટે પણ ખર્ચવામાં આવે છે. અગાઉ ભારતમાંથી માલદીવ જનારા પ્રવાસીઓની સંખ્યામાં ઘટાડો થયો છે.

દર વર્ષે  બજેટ વધતું હતું, આ વર્ષે ઘટ્યું

કેન્દ્ર સરકારે માલદીવ માટે 2023-24ના બજેટમાં સંસોધન કરીને રકમ વધારીને રૂ. 771 કરોડ કરી હતી. જ્યારે ફેબ્રુઆરી 2023માં રજૂ કરાયેલ મંજૂર રકમ 400 કરોડ રૂપિયા રાખવામાં આવી હતી. ભારત સરકારે વર્ષ 2022-23ના બજેટમાં ભારત અને માલદીવ વચ્ચેના સંબંધોને મજબૂત કરવા માટે 183 કરોડ રૂપિયા રાખ્યા હતા. હવે માલદીવ માટે બજેટમાં સતત વધતી જતી રકમમાં આ વખતે ઘટાડો એ ભારત સાથેના તેના સંબંધો નબળા થવાનો સંકેત આપે છે.

શું છે વિવાદ?

PM મોદીએ 4 જાન્યુઆરીએ સોશિયલ મીડિયા પર લક્ષદ્વીપની તેમની મુલાકાતની તસવીરો શેર કરી હતી. આ પછી લોકો કહેવા લાગ્યા કે, હવે ભારતીયોએ માલદીવ નહીં પણ લક્ષદ્વીપ જવું જોઈએ. આ વિષય સોશિયલ મીડિયા પર ટ્રેન્ડ કરી રહ્યો હતો. આ દરમિયાન માલદીવની મુઈઝુ સરકારમાં મંત્રી મરિયમ શિયુનાએ કેટલીક વાંધાજનક ટ્વીટ કરી હતી. અહીં તેમણે PM મોદીની મજાક પણ ઉડાવી હતી. આ સિવાય તે લક્ષદ્વીપની મજાક ઉડાવતા પણ જોવા મળ્યા હતા. તેમના પછી માલદીવના નેતાઓ માલશા શરીફ અને મહજૂમ માજીદે પણ કેટલીક વાંધાજનક પોસ્ટ કરી હતી.