આસામ સરકારનો મોટો નિર્ણય, હોટલ-રેસ્ટોરન્ટ-સાર્વજનિક સ્થાનો પર ગૌમાંસનો પ્રતિબંધ
Updated: Dec 4th, 2024
Assam Government ban on Beef : આસામમાં બીફ (ગૌમાંસ) પર પ્રતિબંધ છે. આસામના મુખ્યમંત્રી હિમંતા બિસ્વા સરમાએ પત્રકાર પરિષદમાં જાહેર કર્યું કે, આસામ કેબિનેટે રાજ્યમાં હોટલ, રેસ્ટોરન્ટ અને જાહેર સ્થળો પર બીફ પર પ્રતિબંધ મૂકવાનો નિર્ણય લીધો છે. ગૌમાંસ પર પ્રતિબંધ અંગેના નિર્ણય બાદ આસામના મંત્રી પીયૂષ હજારિકાએ પોસ્ટ કરી કે, હું આસામ કોંગ્રેસને પડકાર આપું છું કે બીફ પરના પ્રતિબંધનું સ્વાગત કરે અથવા પાકિસ્તાનમાં રહેવા જતા રહે.
પ્રેસ કોન્ફરન્સ દરમિયાન હિમંતા બિસ્વા સરમાએ કહ્યું કે, આસામ કેબિનેટનું વિસ્તરણ 7 ડિસેમ્બરે બપોરે 12 વાગ્યે થશે. જણાવી દઈએ કે, મુખ્યમંત્રી હિમંતા બિસ્વા સરમાએ તાજેતરમાં કહ્યું હતું કે જો કોંગ્રેસના પ્રદેશ અધ્યક્ષ ભૂપેન કુમાર બોરા તેમને પત્ર લખીને માંગણી કરશે તો તેઓ આસામમાં બીફ પર પ્રતિબંધ મૂકવા માટે તૈયાર છે.
આ પણ વાંચોઃ ઉદ્ધવ ઠાકરેના નિવેદનથી ‘મહાવિકાસ અઘાડી’ મુશ્કેલીમાં! ચૂંટણીમાં હાર બાદ કહી નાખી મોટી વાત
આસામમાં કોંગ્રેસના સાંસદ રકીબુલ હુસૈને ભાજપ પર આરોપ લગાવ્યો હતો કે, તેમણે નાગાંવ જિલ્લાના સામગુરી વિધાનસભા ક્ષેત્રમાં બીફ પાર્ટીનું આયોજન કર્યું હતું. આ કાર્યક્રમનો હેતુ મુસ્લિમ મતદારોને આકર્ષવાનો હતો. આ મુદ્દે ચૂંટણી પંચ દ્વારા પૂછવામાં આવતા કોઈપણ પ્રશ્નોના જવાબ આપવા તૈયાર હોવાનો દાવો કર્યો હતો.
હિમંતાએ કહ્યું હતું કે હુસૈનના નિવેદન અંગે બીફ અંગેના વલણ બાબતે પ્રદેશ કોંગ્રેસ અધ્યક્ષ ભૂપેન બોરાને પત્ર લખીશ. શું તેઓ પણ રકીબુલ હુસૈનની જેમ બીફ પર પ્રતિબંધ મૂકવાની હિમાયત કરે છે? આગામી વિધાનસભા સત્રમાં હું બીફ પર સંપૂર્ણ પ્રતિબંધ લગાવીશ. પછી બીજેપી, એજીપી, સીપીએમ, કોઈ બીફ આપી શકશે નહીં અને હિન્દુ, મુસ્લિમ અને ખ્રિસ્તી બધાએ બીફ ખાવાનું બંધ કરવું જોઈએ. બધી સમસ્યાઓ હલ થઈ જશે.
