'અબ કી બાર 400 પાર ઘણું મુશ્કેલ..' NDAના સાથી પક્ષના કદાવર નેતાનું ભાજપ અંગે મોટું નિવેદન

Lok Sabha Elections 2024 | અજિત પવાર જૂથના વરિષ્ઠ નેતા છગન ભુજબળનું કહેવું છે કે 2014 અને 2019ની જેમ આ વખતે પણ ભાજપનો રસ્તો સરળ નથી. તેમણે દાવો કર્યો કે જે રીતે ઉદ્ધવ ઠાકરે અને શરદ પવારની પાર્ટીઓ તૂટી છે, લોકોને બંને નેતાઓ પ્રત્યે સહાનુભૂતિ છે, જેનો ફાયદો તેમને આ વખતે લોકસભા ચૂંટણીમાં મળી શકે છે. 

એનડીએને તકલીફ પડશે 

તેમણે એમ પણ કહ્યું કે એનડીએ માટે આ વખતે રસ્તો ઘણો મુશ્કેલ છે. જો કે, લોકોને વડાપ્રધાન નરેન્દ્ર મોદીની ક્ષમતામાં વિશ્વાસ છે અને તેઓ ઇચ્છે છે કે તેઓ ફરીથી દેશમાં મજબૂત સરકાર બનાવે. નાશિક સીટ પરથી પોતાનો દાવો પાછો ખેંચવા પર ભુજબળે કહ્યું કે મેં ક્યારેય કોઈની પાસેથી પોતાના માટે સીટ માંગી નથી. તેથી જ્યારે ત્રણ અઠવાડિયા સુધી તેમના નામની જાહેરાત ન થઈ, ત્યારે તેમણે ચૂંટણી ન લડવાનો નિર્ણય કર્યો.

બે ઘટનાઓનો ઉલ્લેખ કર્યો... 

એનસીપીના વરિષ્ઠ નેતા છગન ભુજબળ શરદ પવાર સાથેના વિભાજન વખતે અજિત પવારની સાથે ફ્રન્ટ ફુટ પર હતા. તેમણે કહ્યું કે આ વખતે મહારાષ્ટ્રમાં બીજેપી ગઠબંધન માટેનો રસ્તો એટલો સરળ નથી જેટલો 2014 અને 2019 દરમિયાન હતો. કારણ કે છેલ્લા બે વર્ષમાં મહારાષ્ટ્રના રાજકારણમાં રસપ્રદ ઘટનાક્રમો થયા છે. સૌપ્રથમ, 2022 માં, એકનાથ શિંદે ઉદ્ધવ જૂથથી અલગ થઈ ગયા અને તેમની સરકારને પાડી દીધી. ત્યારબાદ મહારાષ્ટ્રમાં ભાજપ ગઠબંધન સાથે સરકાર બનાવી. બીજા વર્ષે પણ બરાબર એ જ થયું. અજિત પવારે પણ શરદ પવારની એનસીપીથી અલગ થઈને આવું જ કર્યું, તેઓ હાલમાં મહારાષ્ટ્રમાં ડેપ્યુટી સીએમ છે અને મહાયુતિ ગઠબંધન સાથે સરકારમાં છે.

લોકોને એમના માટે સહાનુભૂતિ 

છગન ભુજબલે કહ્યું, "મારું માનવું છે કે આ સહાનુભૂતિની લહેર હોઈ શકે છે. જે રીતે ઉદ્ધવ ઠાકરેની શિવસેના વિભાજિત થઈ અને એનસીપીના એક જૂથે પક્ષ બદલ્યો. આ ચૂંટણી રેલીઓમાં પણ દેખાય છે. 2014 અને 2019ની છેલ્લી લોકસભાની બંને ચૂંટણીમાં, ભાજપે અવિભાજિત શિવસેના સાથે જોડાણ કરીને ચૂંટણી લડી હતી અને પક્ષોએ અનુક્રમે 23 અને 18 બેઠકો જીતી હતી.