કુરાનનું અપમાન કરનારાને ફરી ચૂંટણી મેદાને ઉતારતાં AAP ફસાઈ, મોટો મુદ્દો મળી જતાં વિપક્ષ આક્રમક

Image: Facebook

Delhi Assembly Election 2025: દિલ્હીમાં વિધાનસભા ચૂંટણી માટે આમ આદમી પાર્ટી (આપ) એ તમામ 70 બેઠકો પર પોતાના ઉમેદવારોની જાહેરાત કરી દીધી. પાર્ટીએ રવિવારે ચોથી યાદી જાહેર કરી જેમાં પૂર્વ મુખ્યમંત્રી અરવિંદ કેજરીવાલ સહિત 38 ઉમેદવાર છે. તેમાંથી એક નામ એવું પણ છે જેના કારણે હવે દિલ્હી ચૂંટણીમાં કુરાનનું અપમાન એક મોટો મુદ્દો બની શકે છે. મુસ્લિમ બહુમત બેઠકો પર ચૂંટણી લડવાની તૈયારીમાં લાગેલી ઓલ ઈન્ડિયા મજલિસ-એ-ઈત્તેહાદુલ મુસ્લિમીન (એઆઈએમઆઈએમ) એ આને મુસલમાનોના ગાલ પર તમાચો ગણાવતાં આપને ઘેરી છે. ભાજપ પણ આ મુદ્દાને ગરમાવી રહી છે.

કયા ઉમેદવારને લઈને વિવાદ

આ સમગ્ર વિવાદ મહરૌલી બેઠક પર આપના ઉમેદવારને લઈને ઉત્પન્ન થયો છે. પાર્ટીએ આ બેઠકથી એક વખત ફરી પોતાના વર્તમાન ધારાસભ્ય નરેશ યાદવને ઉતાર્યા છે. નરેશ યાદવને તાજેતરમાં જ કુરાનના અપમાનનો દોષી ઠેરવી દેવાયા છે. કોર્ટે તેમને 2 વર્ષ કેદ અને 11 હજાર રૂપિયા દંડની સજા સંભળાવી છે. તે બાદથી જ નરેશ યાદવને આપથી કાઢવાની માગ ઉઠી રહી હતી પરંતુ પાર્ટીએ તેમને એક વખત ફરી તક આપવાનો નિર્ણય કર્યો. તે બાદ અસદુદ્દીન ઓવૈસીની પાર્ટીને એક મોટો મુદ્દો મળી ગયો છે. જેના સહારે તે દિલ્હીના મુસ્લિમોને પોતાની તરફ ખેંચવાના પ્રયત્નમાં લાગી ગઈ છે.

કુરાનના અપમાનનો શું છે કેસ

પંજાબમાં માલેરકોટલા જિલ્લાની એક કોર્ટે 30 નવેમ્બરે મહત્વનો નિર્ણય આપતાં નરેશ યાદવને બે વર્ષની સજા સંભળાવી. તેની પર 11 હજાર રૂપિયાનો દંડ પણ લગાવાયો છે. કુરાનના અપમાનનો આ મામલો 2016નો છે. માલેરકોટલામાં પવિત્ર કુરાનના અમુક પાના ફાટેલા હતા. પોલીસે શરૂઆતમાં વિજય, ગૌરવ અને કિશોર મામલો નોંધ્યો હતો પરંતુ બાદમાં આ મામલે આપ ધારાસભ્ય યાદવની ધરપકડ કરવામાં આવી હતી. યાદવને માર્ચ 2021માં નીચલી કોર્ટે મુક્ત કરી દીધા હતા. જે બાદ ફરિયાદકર્તા મોહમ્મદ અશરફે તેમને મુક્ત કર્યા વિરુદ્ધ અપીલ દાખલ કરી હતી. એડિશનલ ડિસ્ટ્રિક્ટ એન્ડ સેશન્સ જજ પરમિન્દર સિંહ ગ્રેવાલની કોર્ટે શુક્રવારે આ મામલે યાદવને દોષી ઠેરવ્યા અને નિર્ણય સંભળાવ્યો. નરેશને IPCની કલમ 295એ (કોઈ પણ વર્ગના ધર્મ કે ધાર્મિક આસ્થાનું અપમાન કરીને તેમની ધાર્મિક ભાવનાઓને અપમાનિક કરવાના ઈરાદાથી જાણીજોઈને કરવામાં આવેલું દુર્ભાગ્યપૂર્ણ કાર્ય), 153એ (ધર્મના આધારે વિભિન્ન જૂથોની વચ્ચે દુશ્મનાવટને પ્રોત્સાહન આપવું) અને 120બી (ગુનાહિત કાવતરું) હેઠળ દોષી ઠેરવવામાં આવ્યા.

આ પણ વાંચો: ઠાકરે બંધુ ફરી થશે એકજૂટ? જાણો કઈ વાતથી મળ્યાં સંકેત, મહારાષ્ટ્રના રાજકારણમાં ચર્ચા છંછેડાઈ

મુદ્દો બનાવવામાં લાગી એઆઈએમઆઈએમ

નરેશ યાદવને ટિકિટ આપ્યા બાદ એઆઈએમઆઈએમે 'કુરાનના અપમાન' ને મોટો મુદ્દો બનાવી દીધો છે. પાર્ટીએ રવિવારે સાંજે મુસ્તફાબાદમાં પ્રદર્શન કર્યું. ઓવૈસીની પાર્ટી મુસ્લિમોની વચ્ચે આ વાતને જોરશોરથી પ્રચારિત કરવામાં લાગી ગઈ છે. એઆઈએમઆઈએમના દિલ્હી પ્રવેશ અધ્યક્ષ શોએબ જમઈએ પ્રદર્શનનો વીડિયોને શેર કરતાં લખ્યું, 'આમ આદમી પાર્ટીએ મહરોલીથી એવા ઉમેદવારને ટિકિટ આપી જેની પર ઈસ્લામ ધર્મની તોહીન અને સાંપ્રદાયિક ભાવનાને ઠેસ પહોંચાડવા માટે કોર્ટથી સજા થઈ. તેના વિરોધમાં દિલ્હીમાં AIMIM ના પાર્ટી કાર્યકર્તાઓએ અરવિંદ કેજરીવાલના પૂતળા પર ચપ્પલ મારીને પોતાનો રોષ પ્રગટ કર્યો. આમ આદમી પાર્ટીએ જે મુસ્લિમોને વોટ આપ્યા, તેમના ગાલ પર થપ્પડ મારવામાં આવી.' એઆઈએમઆઈએમના નેતાઓ અને કાર્યકર્તાઓએ સોશિયલ મીડિયા પર પણ આ મુદ્દાને જોરશોરથી ઉઠાવવાનું શરૂ કરી દીધું છે.

શું આપની મુશ્કેલી વધશે?

દિલ્હીમાં ગત બે વિધાનસભા ચૂંટણીમાં દિલ્હીના મોટાભાગના મુસ્લિમ વોટર્સે આપનો સાથ આપ્યો છે. પાર્ટીએ બંને ચૂંટણીમાં તે તમામ મુસ્લિમ બહુસંખ્યક બેઠકો પર જીત મેળવી છે. જેમને એક સમયે કોંગ્રેસનો મજબૂત ગઢ માનવામાં આવતો હતો. ઉત્તર ભારતના રાજ્યોમાં પોતાના વિસ્તારમાં લાગેલી ઓવૈસીની પાર્ટી એઆઈએમઆઈએમ દિલ્હી ચૂંટણીમાં જોરશોરથી ઉતરવા જઈ રહી છે. પાર્ટીએ દિલ્હી હુલ્લડના આરોપી તાહિર હુસૈનને મુસ્તફાબાદથી ટિકિટ આપી છે. એઆઈએમઆઈએમ આપના મુસ્લિમ વોટબેન્કમાં હાથ અજમાવવાના પ્રયત્નમાં છે. બીજી તરફ ભાજપ પણ આ મુદ્દાને જોરશોરથી ઉઠાવી રહી છે. ગત દિવસોમાં લઘુમતી મોર્ચા તરફથી આ મુદ્દા પર મોટું પ્રદર્શન કરવામાં આવ્યું હતું.