કેજરીવાલની ફરિયાદ બાદ ચૂંટણી આયોગ આવ્યું એક્શનમાં, ભાજપના પ્રવેશ વર્મા વિરૂદ્ધ થશે તપાસ

AAP On Parvesh Verma : આમ આદમી પાર્ટી (AAP) દ્વારા ભાજપના ઉમેદવાર પ્રવેશ વર્મા વિરુદ્ધ કેન્દ્રીય ચૂંટણી આયોગને આપવામાં આવેલી ફરિયાદને આજે ગુરુવારે દિલ્હી ચૂંટણી કમિશનરને મોકલવામાં આવી. ચૂંટણી આયોગે દિલ્હીના મુખ્ય ચૂંટણી અધિકારીને AAPની ફરિયાદની તપાસ કરવા, તથ્યોની ખાતરી કરવા અને આદર્શ આચારસંહિતા મુજબ તાત્કાલિક યોગ્ય પગલા લેવા જણાવ્યું છે. જેમાં કાર્યવાહીનો રિપોર્ટ કમિશનને મોકલવામાં આવશે.

AAPએ નવી દિલ્હી વિધાનસભા મતવિસ્તારમાંથી ભાજપના ઉમેદવાર પ્રવેશ વર્માની વિરુદ્ધમાં આદર્શ આચારસંહિતાના ઉલ્લંઘની ફરિયાદ કરી હતી. જેમાં AAP એ નવી દિલ્હી વિધાનસભા મતવિસ્તારની ચૂંટણી ભૂમિકામાં ફેરફારો અને કાપનો પણ આરોપ લગાવ્યો હતો.

ચૂંટણી આયોગે શું કહ્યું?

કેન્દ્રીય ચૂંટણી આયોગે દિલ્હી ચૂંટણી આયોગને જણાવ્યું હતું કે, 'AAPના પ્રતિનિધિમંડળ તરફથી મતો કાઢી નાખવા અને નવા મતો ઉમેરવા અંગે ફરિયાદ મળી છે. આ સાથે ભાજપના ઉમેદવાર પ્રવેશ વર્મા સામે આચારસંહિતા ભંગની ફરિયાદ મળી છે. કેન્દ્રીય ચૂંટણી આયોગે દિલ્હી ચૂંટણી કમિશનરને AAPના પ્રતિનિધિમંડળ દ્વારા આપવામાં આવેલી આ ફરિયાદો પર ચૂંટણી આયોગના નિયમો અનુસાર યોગ્ય કાર્યવાહી કરવા અને કાર્યવાહીની માહિતી કેન્દ્રીય ચૂંટણી આયોગને મોકલવા જણાવ્યું.'

AAPએ કયા આરોપો લગાવ્યા?

AAPના વડા અરવિંદ કેજરીવાલે ચૂંટણી આયોગના વરિષ્ઠ અધિકારીઓને મળ્યા હતા અને માગ કરી હતી કે, 'નવી દિલ્હી વિધાનસભા મતવિસ્તારના તેમના હરીફ ભાજપના ઉમેદવાર પ્રવેશ વર્માને દિલ્હી ચૂંટણી લડવાથી રોકવામાં આવે. ભૂતપૂર્વ સાંસદ પર ખુલ્લેઆમ પૈસા વહેંચવાનો આરોપ લગાવતા, ભૂતપૂર્વ મુખ્યમંત્રીએ ચૂંટણી પંચને પ્રવેશ વર્માના ઘર પર દરોડા પાડવાની માગ કરી હતી.'

આ પણ વાંચો: 'સમાન જાતિના લગ્ન' પર પુનર્વિચાર અરજી ફગાવી, સુપ્રીમ કોર્ટે કહ્યું- 'નિર્ણયમાં કોઈ ખામી નથી'

અરવિંદ કેજરીવાલે કહ્યું, 'નવી દિલ્હી વિધાનસભા મતવિસ્તારના ભાજપના ઉમેદવાર પ્રવેશ વર્મા જોબ કેમ્પનું આયોજન કરી રહ્યા છે, ખુલ્લેઆમ પૈસા વહેંચી રહ્યા છે. આ બાબતો ચૂંટણી આયોગના નિયમોમાં ભ્રષ્ટ આચરણ હેઠળ આવે છે. પ્રવેશ વર્માને ચૂંટણી લડવાથી રોકવામાં આવે અને તેમના ઘરે દરોડા પાડવા જોઈએ જેથી ખબર પડે કે તેમના ઘરમાં કેટલા પૈસા છે.'