'મનમોહન સિંહની સમાધિ માટે ભાજપ થોડી જમીન પણ ન આપી શકી', કેજરીવાલના કેન્દ્ર પર પ્રહાર

Manmohan Singh Funeral: દેશના પૂર્વ વડાપ્રધાન ડૉ.મનમોહન સિંહ પંચમહાભૂતમાં વિલિન થઇ ગયા. તેમના અંતિમ સંસ્કાર આજે નિગમબોધ સ્મશાન ગૃહમાં કરવામાં આવ્યા હતા. શનિવારે કોંગ્રેસ મુખ્યાલયથી નિગમબોધ ઘાટ સુધી તેમની અંતિમ યાત્રા કાઢવામાં આવી હતી. તેમની અંતિમ યાત્રામાં મોટી સંખ્યામાં લોકો જોડાયા હતા. વડાપ્રધાન નરેન્દ્ર મોદીએ પણ નિગમબોધ ઘાટ પર તેમને શ્રદ્ધાંજલિ આપી હતી. ત્યારે હવે આમ આદમી પાર્ટી અને કેજરીવાલ દ્વારા કેન્દ્ર સરકાર પર પ્રહાર કરાયા છે.

દિલ્હીના પૂર્વ મુખ્યમંત્રી અરવિંદ કેજરીવાલે કહ્યું કે, 'ભારતના વડાપ્રધાન ડૉ. મનમોહન સિંહજીના અંતિમ સંસ્કાર નિગમ બોધ ઘાટ પર કરાયા. તેના પહેલા ભારતના તમામ વડાપ્રધાનોના અંતિમ સંસ્કાર રાજઘાટ પર કરવામાં આવતા હતા. શીખ સમાજે આવનારા, સમગ્ર દુનિયામાં જાણીતા, 10 વર્ષ ભારતના વડાપ્રધાન રહેલા ડૉ. મનમોહન સિંહજીના અંતિમ સંસ્કાર અને સમાધિ માટે ભાજપ સરકાર 1000 ગજ જમીન પણ ન આપી શકી.'

અંતિમ સંસ્કાર મામલે AAPના ગંભીર આરોપ

ભાજપે શીખ સમુદાયનું અપમાન કર્યું: AAP

પૂર્વ વડાપ્રધાન ડૉ. મનમોહન સિંહના સ્મારક માટે જગ્યાના મુદ્દે આમ આદમી પાર્ટીના સાંસદ સંજય સિંહે કહ્યું, 'દુર્ભાગ્યની વાત છે કે અમારે આ વિશે વાત પણ કરવી પડી. આ દર્શાવે છે કે સરકારની વિચારસરણી કેટલી ક્ષુદ્ર છે. હું પીએમ નરેન્દ્ર મોદીને પૂછવા માંગુ છું કે તમે પૂર્વ પીએમ મનમોહન સિંહના અંતિમ સંસ્કાર માટે રાજઘાટ સંકુલમાં જગ્યા આપવા કેમ તૈયાર નથી? આ ભાજપની વિચારસરણી છે. તેઓ પોતાને સૌથી સંસ્કારી પાર્ટી કહે છે, મને એવા ભૂતપૂર્વ વડાપ્રધાનનું નામ કહો જેમના અંતિમ સંસ્કાર નિગમબોધમાં કરવામાં આવ્યા હતા... આજે શીખ સમુદાયના લોકો કેટલું અપમાનિત અનુભવી રહ્યા હશે.' 

આ પણ વાંચો: પૂર્વ વડાપ્રધાન મનમોહન સિંહને રાજકીય સન્માન સાથે વિદાય, પુત્રીએ આપ્યો મુખાગ્નિ, પાર્થિવ દેહ પંચમહાભૂતમાં વિલિન

જાણો આ મામલે કોંગ્રેસે શું કહ્યું 

કોંગ્રેસ નેતા નવજોત સિંહ સિદ્ધુએ પણ ભારતીય જનતા પાર્ટીની ટીકા કરી અને તેના પર રાજનીતિ કરવાનો આરોપ લગાવ્યો. આ બાબતે પત્રકારો સાથે વાત કરતા સિદ્ધુએ કહ્યું, 'જ્યારે કોઈ વ્યક્તિનું મૃત્યુ થાય છે, ત્યારે તેની સાથેની બધી દુશ્મની સમાપ્ત થઈ જાય છે. પરંતુ અહીં રાજકારણ થઈ રહ્યું છે. હું એક નાનકડો પ્રશ્ન પૂછું છું કે જો અટલજીના અંતિમ સંસ્કાર કરવામાં આવે અને જો કોઈ કહે કે રાજઘાટ પર સ્મારક બનાવવામાં આવશે નહીં, તો તમને કેવું લાગશે? આ કોઈ પક્ષનો મુદ્દો નથી પરંતુ દેશના ઈતિહાસનો છે.'