RBIની કાર્યવાહી પછી પેટીએમ પેમેન્ટ બેંકમાં 20 ટકા કર્મચારીઓની નોકરી પર લટકતી તલવાર

Paytm Payments Bank: રિઝર્વ બેંક ઓફ ઈન્ડિયા (RBI)એ  પેટીએમ પેમેન્ટ બેંક પર પ્રતિબંધ લગાવ્યો છે. આ પ્રતિબંધ 15મી માર્ચ પછી સંપૂર્ણ રીતે લાગુ થવાનો છે. અહેવાલ અનુસાર, પેટીએમ પેમેન્ટ બેંકે 20 ટકા સ્ટાફની છટણી કરી શકે છે. આરબીઆઈએ નિયમનકારી નિયમોનું પાલન કરવામાં બેદરકારીને કારણે જાન્યુઆરીના અંતમાં પેટીએમ પેમેન્ટ બેંક પર પ્રતિબંધ મૂક્યો હતો. જો કે, કરોડો ગ્રાહકોને પડતી અસુવિધાને ધ્યાનમાં રાખીને શરૂઆતમાં 29મી ફેબ્રુઆરી સુધી છૂટ આપવામાં આવી હતી, જ્યારે બાદમાં તેને 15મી માર્ચ સુધી લંબાવી દેવામાં આવી હતી.

પેટીએમે નિયમોનું પાલન કર્યું નહોતું

પેટીએમ પેમેન્ટ બેંકના સ્થાપક વિજય શેખર શર્મા છે. પેટીએમ પેમેન્ટ બેંકને ભારતીય રિઝર્વ બેંક તરફથી પેમેન્ટ બેંકનું લાઈસન્સ મળ્યું છે. તેથી પેટીએમ પેમેન્ટ બેંક એક કંપની છે જે નિયમનના દાયરામાં આવે છે. જ્યારે પેટીએમ પેમેન્ટ બેંકે આ નિયમનકારી નિયમોનું યોગ્ય રીતે પાલન નહોતું કર્યું, જેના કારણે રિઝર્વ આરબીઆઈએ પેટીએમ પેમેન્ટ બેંક પર પ્રતિબંધ લગાવ્યા છે. 

પેટીએમ પેમેન્ટ બેંકમાં છટણી થશે

એ સમજવું અગત્યનું છે કે પેટીએમ એટલે કે વન97 કોમ્યુનિકેશને પેટીએમ પેમેન્ટ બેંક યુનિટમાંથી 20 ટકા કર્મચારીઓને છૂટા કરી શકે છે. ડિસેમ્બર 2023 સુધીના આંકડા અનુસાર, કંપનીના આ યુનિટમાં લગભગ 2,775 કર્મચારીઓ કામ કરે છે. આ મુજબ આ છટણીથી 553 લોકોની નોકરી પર અસર થશે.

પેટીએમ પેમેન્ટ બેંક 15મી માર્ચ પછી બંધ 

પેટીએમ પેમેન્ટ બેંકને 15મી માર્ચ બંધ થઈ જશે. આવી સ્થિતિમાં તેની લગભગ તમામ સેવાઓ 16મી માર્ચથી બંધ થઈ જશે. પેટીએમ પેમેન્ટ્સ બેંકના ગ્રાહકો 16મી માર્ચથી તેમના ખાતામાં કોઈ નવા પૈસા જમા કરાવી શકશે નહીં. ઉપરાંત ખાતા સંબંધિત ફાસ્ટેગ, બિલ પેમેન્ટ વગેરે પર પણ પ્રતિબંધ મૂકવામાં આવશે. પેટીએમ પેમેન્ટ્સ બેંક સાથે જોડાયેલા પ્રીપેડ કાર્ડ અથવા ડિજિટલ વોલેટ પણ હવે ઉપયોગના રહેશે નહીં. જો કે, લોકોને બાકીની રકમ તેમના ખાતામાં ટ્રાન્સફર કરવાની સ્વતંત્રતા મળી છે. આરબીઆઈએ ફાસ્ટેગનો ઉપયોગ કરવા માટે પણ રાહત આપી છે, જ્યાં સુધી બાકીની રકમ સમાપ્ત ન થઈ જાય, પરંતુ NHAIએ 15મી માર્ચથી પેટીએમ પેમેન્ટ બેંક દ્વારા જાહેર કરાયેલા ફાસ્ટેગ પર પ્રતિબંધ મૂકવાનો નિર્ણય લીધો છે.