મહારાષ્ટ્રમાં NDAનું વિસ્તરણ થવાની શક્યતા, ઉદ્ધવ ઠાકરેના ભાઈની પાર્ટી પણ હાથ મિલાવી શકે

Image Source: Twitter

મુંબઈ, તા. 19 ફેબ્રુઆરી 2024, સોમવાર

મહારાષ્ટ્રમાં નેશનલ ડેમોક્રેટિક એલાયન્સ (NDA)નો સમૂહ વધુ વધી શકે છે. સૂત્રોએ જણાવ્યું છે કે, ટૂંક સમયમાં રાજ ઠાકરેની પાર્ટી મહારાષ્ટ્ર નવનિર્માણ સેના (MNS) એનડીએમાં સામેલ થઈ જશે. મુંબઈના બીજેપી અધ્યક્ષ આશિષ શેલારે MNS અધ્યક્ષ રાજ ઠાકરે સાથે મુલાકાત કરી અને કલાકથી વધુ સમય સુધી ચર્ચા કરી હતી. આ બેઠક બાદ અંદાજો લગાવવામાં આવી રહ્યો છે કે રાજ ઠાકરે ટૂંક સમયમાં મહાયુતિના સાથી બની શકે છે. રાજ ઠાકરેને ટૂંક સમયમાં દિલ્હી બોલાવવામાં આવી શકે છે. તેઓ અહીં ભાજપના વરિષ્ઠ નેતાઓ સાથે મુલાકાત કરશે.

દેવેન્દ્ર ફડણવીસે કર્યો હતો દાવો

આ અગાઉ 15 ફેબ્રુઆરીના રોજ ડેપ્યુટી સીએમ દેવેન્દ્ર ફડણવીસે 'લોકમત'ના કાર્યક્રમમાં કહ્યું હતું કે, તમને ટૂંક સમયમાં એ વાતની જાણ થશે કે, રાજ ઠાકરે સાથે આવશે કે નહીં. સમય જણાવશે કે, MNS હવે ક્યાં હશે. રાજ ઠાકરે સાથે અમારી સારી મિત્રતા છે અને અમારી વચ્ચે બેઠકો થતી રહી છે.

લોકસભા ચૂંટણીની તૈયારીમાં રાજ ઠાકરે

મહારાષ્ટ્ર નવનિર્માણ સેનાએ 9 માર્ચના રોજ નાસિક શહેરમાં પોતાની વર્ષગાંઠ ઉજવવાનો નિર્ણય કર્યો છે ત્યારે પાર્ટીના અધ્યક્ષ રાજ ઠાકરે રાજ્યભરના પદાધિકારીઓ અને પદાધિકારીઓની સભાને સંબોધિત કરશે. તેમનો 7 માર્ચના રોજ મોડી સાંજે નાસિક પહોંચવાનો કાર્યક્રમ છે. 8મી માર્ચે તેઓ પાર્ટીના પદાઅધિકારીઓની બેઠક કરશે. તેઓ સાંજે કાલારામ મંદિરમાં 'આરતી' કરશે.

PM નરેન્દ્ર મોદી અને શિવસેના (UBT) અધ્યક્ષ ઉદ્ધવ ઠાકરે બાદ રાજ ઠાકરે મંદિરમાં દર્શન અને આરતી કરનાર ત્રીજા હાઈ-પ્રોફાઈલ વ્યક્તિ હશે. MNS શહેર એકમના અધ્યક્ષ સુદામ કોમ્બડેએ જણાવ્યું હતું કે, શહેર એકમ નાસિકથી લોકસભા ચૂંટણી લડવા પર ભાર મૂકશે. જોકે, અંતે તેઓ પાર્ટીના પ્રમુખના આદેશનું પાલન કરશે. કોમ્બડેએ કહ્યું કે, નાસિકના લોકોએ ભૂતકાળમાં પણ ઠાકરે પર પ્રેમ અને આશીર્વાદ વરસાવ્યા છે. અમે 2012 થી 2017 સુધી નાશિક મ્યુનિસિપલ કોર્પોરેશનમાં સત્તા પર હતા, મેયર પણ પાર્ટીના હતા.