ભારે વરસાદમાં કાર કન્ટેનર ટ્રક સાથે અથડાતાં અકસ્માતમાં ચારના મોત

- તમામ શખ્સો લાતુર રોડથી સંભાજી નગર જઈ રહ્યા હતા

- લો વિઝીબીલીટીને કારણે  દુર્ઘટનાઃ કન્ટેનર નીચે ફસાઈ ગયેલી કારનો કચ્ચરઘાણ નીકળી ગયો

મુંબઇ : બીડમાં શનિવારે મધ્યરાત્રીએ ભારે વરસાદને કારણે કાર અને કન્ટેનર ટ્રક સાથે અથડામણ થતા ભીષણ અકસ્માત સર્જાયો હતો. આ અકસ્માતમાં ચાર શખ્સોનું ઘટનાસ્થળે જ મૃત્યું થયું હતું. 

વિગત મુજબ, આ અકસ્માત અંબેજોગાઈ લાતુર રોડ પર મધ્યરાત્રીએ ૧ વાગ્યાની આસપાસ થયો હતો. જેમાં  બાબુરાવ ખલંગરે, બાનાપુરે અને સૌદાગર કાંબળે સહિત ચારનું મૃત્યું થયું હતું. આ તમામ લોકો લાતુરના જગલપુરથી છત્રપતિ સંભાજીનગર જઈ રહ્યા હતા. 

તે સમયે ભારે વરસાદ વચ્ચે  સ્વીફ્ટ કાર  અને  કન્ટેનર ટ્રક સાથે અથડામણ થતા.   ભીષણ અકસ્માત સર્જાતા કાર ભારે વાહન નીચે  ફસાઈ  જતા કારનો કચ્ચરઘાણ નીકળી ગયો હતો. આ અકસ્માત સમયે ચાર લોકો કારમાં સવાર હતા. આ ચારેયનું ઘટનાસ્થળે જ મોત નીપજ્યું હતું.

માહિતી મળતા જ પોલીસ અને રેસ્ક્યુ ટીમ તાત્કાલિક ઘટનાસ્થળે પહોંચી ગઈ હતી અને કારને ભારે વાહનના નીચેથી બહાર કાઢીને તમામ મૃતદેહોને પોસ્ટમોર્ટમ માટે હોસ્પિટલમાં ખસેડયા હતા. 

પોલીસની પ્રાથમિક તપાસ મુજબ, ભારે વરસાદને કારણે અને લો વિઝીબિલીટીના કારણે આ ભીષણ અકસ્માત સર્જાયો હોઈ શકે છે.  જો કે,અકસ્માતનું ચોક્કસ કારણ હજુ જાણી શકાયું નથી. પોલીસે આ મામલે કેસ નોંધી વધુ તપાસ હાથ ધરી હતી.