ડોમ્બિવલી પોલીસ મથકે યુવકોનો મહિલા પોલીસ સામે વસ્ત્રો ઉતારી ડાન્સ

જાહેરમાં કારમાં હાઈવોલ્યૂમથી ગીત વગાડવા સામે ઠપકો અપાતાં કૃત્ય

આખું પોલીસ સ્ટેશન માથે લીધું ઃતમામની અટકાયતઃ છમાંથી એક યુવક રીઢો ગુનેગાર છે

મુંબઇ  :  ડોમ્બિવલીમાં અમૂક યુવાનોએ છાકટા બની પોલીસ મથકમાં મહિલા પોલીસ સામે ક પડાં કાઢી નાચવા માંડતા ટિળક નગર પોલીસે છ યુવાનો સામે ગુનો નોંધી તેમની ધરપકડ કરી હતી. ખરેખર તો આ યુવાનો ડોમ્બિવલીના તિલકનગર પોલીસ મથકની હદ્દમાં એક ઠેકાણે રસ્તા પર કારમાં મોટે અવાજે ગીતો વગાડી નાચતા હતા. આ વાતની જાણ થતા પોલીસના બીટ માર્શલો ઘટનાસ્થળે દોડી ગયા હતા અને તેમને આવું કરતા રોક્યા હતા. આ વાતથી યુવાનોને એટલો ગુસ્સો આવ્યોહતો કે તેઓ સીધા પોલીસ મથકમાં પહોંચી ગયા હતા અને પોલીસ સ્ટેશન માથે લીધું હતું.

આ સંદર્ભે વધુ વિગતાનુસાર ડોમ્બિવલીના તિલકનગર પોલીસ સ્ટેશનની હદમાં એક ઠેકાણે રસ્તા પર કાર ઉભી રાખી અમૂક યુવાનો  મોટા અવાજે ગીત લગાવી નાચ કરી રહ્યા હતા. આ વાતની જાણ અમૂક સ્થાનિકોએ પોલીસમાં કરી આ બાબતે ફરિયાદ કરી હતી. આ ફરિયાદ મળતા પોલીસના બીટ માર્શલો ઘટના સ્થળે પહોંચી ગયા હતા અને કારની ઓડિયો સિસ્ટમ બંધ કરાવી તેઓને  ઠપકો આપ્યો હતો અને આવુ ફરી ન કરવાની ચેતવણી આપી હતી. 

આ વાતથી યુવકો એટલા અકળાઇ ગયા હતા કે તેઓ બીટ માર્શલો સાથે પોલીસ સ્ટેશનમાં પહોંચી ગયા હતા અને અહીં ફરજ બજાવતી મહિલા પોલીસો સામે કપડા કાઢી નાચવા માંડયા હતા. યુવાનોનું આ  કૃત્ય  જોઇ પોલીસ પણ હેબતાઇ ગયા હતા. પોલીસે યુવાનોને માંડ-માંડ કાબૂમાં લીધા હતા. અંતે પોલીસે છાકટા બનેલા આ  યુવાનોને તાબામાં લઇ તેમની સામે ગુનો નોંધી તેમની ધરપકડ  કરી હતી.

પોલીસે વિલાસ ભુજંગ, રાજુ ભુજંગ, સિદ્ધાર્થ ગાયકવાડ અને તેમના અન્ય ત્રણ સાથીદારોની ધરપકડ કરી આગળની કાર્યવાહી હાથ ધરી હતી. આ યુવકોમાંથી વિલાસ ભુજંગ સામે અહીંના પોલીસ સ્ટેશનમાં પાંચ ગંભીર ગુનાઓ નોંધાયેલા છે.