અભિનેત્રી નિકીતા રાવલના ગળાં પર ગન રાખી 3.5 લાખની લૂંટ

ગરમ મસાલાની હિરોઈન ભારે ભયભીત

ઘરનોકર પ્રમોદ તથા તેના સાગરિતની પોલીસ દ્વારા ધરપકડ

મુંબઈ :  બોલીવુડની પ્રખ્યાત અભિનેત્રી નિકિતા રાવલ સાથે એક ચોંકાવનારી ઘટના બની હતી. બ્લેક એન્ડ વ્હાઈટ અને ગરમ મસાલા જેવી ફિલ્મોમાં મહત્ત્વની ભૂમિકા ભજવનાર નિકિતાના ગળા પર ગન અને છરી રાખી ઘરનોકરે જ ૩.૫ લાખની લૂંટ કરી હતી. નિકિતા અનુસાર જ્યારે તેણે લૂંટારાઓને રોકવાનો પ્રયાસ કર્યો ત્યારે તેને જાનથી મારી નાંખવાની ધમકી આપવામાં આવી હતી.

આ ઘટના બાદ અભિનેત્રીએ પોલીસમાં ફરિયાદ કરતા પોલીસે ત્વરિત કાર્યવાહી હાથ ધરી નોકર સહિત કુલ બે જણને પકડી પાડયા હતા.

આ સંદર્ભે વધુ વિગતાનુસાર મુંબઈના બાંગુરનગર પોલીસ સ્ટેશનમાં એફઆઈઆર નોંધાવનાર નિકિતાએ માધ્યમોને જણાવ્યું હતું કે મને વિશ્વાસ બેસતો નથી કે મારો ઘરનોકર જ મારી સાથે આવું કૃત્ય કરી શકે છે. તેણે જણાવ્યું હતું કે હાલ આ ઘટનાને લીધે તે ખૂબ જ ભય હેઠળ છે. તેણે વધુમાં કહ્યું હતું કે તેના જ ઘરનોકરે તેના ગળા પર ગન અને છરી મૂકી જાનથી મારી નાંખવાની ધમકી આપી ૩.૫ લાખની લૂંટ ચલાવી હતી.

આ ઘટના બાદ નિકિતાની ફરિયાદ બાદ પોલીસે તેના જ ઘરનોકર ે પ્રમોદની ધરપકડ કરી હતી. આ ઉપરાંત પ્રમોદના જ અન્ય એક સાગરિતને પણ પકડી પાડી આગળની કાર્યવાહી હાથ ધરી હતી. નિકિતાના જણાવ્યાનુસાર છેલ્લા થોડા સમયથી તેના ઘરમાંથી અવારનવાર પૈસાની તેમજ દાગીનાની નાની- મોટી ચોરીની ઘટના બનતી રહી હતી.

નિકિતાએ અનિલ કપૂર સાથે બ્લેક એન્ડ વ્હાઈટ, જોન અબ્રાહમ સાથે ગરમ મસાલા જેવી ફિલ્મો સહિત બોલીવુડ અને ટોલીવુડની અનેક ફિલ્મોમાં કામ કર્યું છે.