કડિયાણા નજીક આઇસર અને કાર વચ્ચે અકસ્માત, એકનું મોત

- અકસ્માતમાં ચૌહાણ પરિવારના ત્રણ સભ્યો ઈજાગ્રસ્ત

- મોરબીના લીલાપુરનો પરિવાર ગુજરવદીમાં માતાજીના માંડવામાં જતો હતો

હળવદ : હળવદ તાલુકાના કડિયાણા ગામ નજીક આઈસર ટેમ્પો અને કાર વચ્ચે રાત્રિના ૧૨:૩૦ની આજુબાજુએ અકસ્માત સર્જાયો હતો. આ ગોઝારા અકસ્માતમાં કારચાલકનું મોત નિપજ્યું હતું. અકસ્માતમાં કારમાં સવાર અન્ય ત્રણ લોકોને ઈજા પહોંચતા સારવાર માટે હળવદ બાદ મોરબી રિફર કરાયા હતા.

હળવદ તાલુકાના કડિયાણા ગામ નજીક આઇસર અને કાર વચ્ચે અકસ્માત સર્જાયો હતો. જેમાં મોરબી તાલુકાના લીલાપર ગામથી ચૌહાણ પરિવાર ધાંગધ્રા તાલુકાના ગુજરવદી ગામે માતાજીના માંડવા પ્રસંગે જઈ રહ્યા હતા. ત્યારે હળવદ તાલુકાના કડીયાણા નજીક આઈસર જીજે-૩૬-૭૫૭૮ અને કાર જીજે-૩૬- એઆઈ-૪૮૪૮ વચ્ચે અકસ્માત સર્જાયો હતો.

અકસ્માતમાં અર્ટિગાના કાર ચાલક અમિતભાઈ કાનજીભાઈ ચૌહાણ (ઉં.વ.૩૫)નું ઘટના સ્થળે મોત નિપજ્યું હતું. જ્યારે તેમના પત્ની પૂજાબેન ચૌહાણને ઇજા થતાં સૌપ્રથમ હળવદ અને ત્યારબાદ મોરબી ખાતે રિફર કરવામાં આવ્યા હતા. જ્યારે તેમના પુત્ર ધુ્રવ અને પુત્રી તન્વીને પણ ઈજા થતાં તેમને પણ સારવાર માટે મોરબી રિફર કરવામાં આવ્યા હતા. ઘટનાની જાણ થતા આજુબાજુના લોકો તાત્કાલિક ઘટના સ્થળે દોડી આવ્યા હતા. આ અકસ્માતની જાણ હળવદ પોલીસને થતા ધટના સ્થળે પહોંચી ટ્રાફિક હળવો કરાવી કાર્યવાહી હાથ ધરી હતી.