ફતેપુરામાં ઓવરટેક કરવાના મુદ્દે મારામારી થતા લાકડીથી હુમલો

 વડોદરા,મોડીરાતે ફતેપુરા વિસ્તારમાં ઓવરટેક કરવાના મુદ્દે કાર ચાલક અને બાઇક ચાલક વચ્ચે મારામારી થઇ હતી. સંવેદનશીલ વિસ્તાર  હોવાથી કુંભારવાડા પોલીસ ઘટના સ્થળે દોડી ગઇ હતી અને મામલો થાળે પાડયો હતો. 

મળતી માહિતી મુજબ, હાથીખાના મહાવત ફળિયામાં રહેતો યાસીન ગનીભાઇ વ્હોરા વેપાર કરે છે. ગઇકાલે રાતે તે બાઇક લઇને ઘરેથી નીકળ્યો હતો. રાતે સાડા અગિયાર વાગ્યે તે ફતેપુરાથી વારસિયા તરફ જવાના રોડ પરથી પસાર થતો હતો. તે સમયે એક કાર ચાલક તેની નજીકમાંથી કાર લઇને પસાર થયો હતો. જેથી, યાસીને કાર ચાલકને ગાડી જોઇને ચલાવવાનું કહેતા કાર ચાલક ઉશ્કેરાયો હતો. કાર ચાલકે યાસીનને ગાળો બોલી ઝપાઝપી શરૃ કરી હતી. કાર ચાલકે ગાડીમાંથી લાકડી કાઢીને યાસીનને ડાબા હાથે ઇજા પહોંચાડી હતી. કાર ચાલકના મિત્રે ડંડા વડે યાસીનને માર માર્યો હતો. કુંભારવાડા પોલીસે આ અંગે ગુનો દાખલ કરી કાયદેસરની કાર્યવાહી હાથ ધરી છે.