ડભોઇરોડ પર ત્રણ યુવકો પર હિંસક હુમલાના બનાવમાં ફરાર નામચીન વિપુલ સહિત બે પકડાયા

વડોદરાઃ ડભોઇ રોડ પર એક મહિના પહેલાં ત્રણ યુવકો પર માથાભારે તત્વોએ  હિંસક હુમલો કરવાના બનેલા બનાવમાં ક્રાઇમ બ્રાન્ચે નામચીન ગુનેગાર સહિત બે હુમલાખોરને ઝડપી પાડયા છે.

પોલીસના જણાવ્યા પ્રમાણે,ડભોઇ રોડ પર વૈષ્ણવ પાર્ક સોસાયટી પાસે હાર્દિક પરમાર, તેના મિત્ર શિવ અને પીયૂષ પટેલ પર ઘાઘરેટિયામાં રહેતા સુમિત ઉર્ફે બિટ્ટુ, વિપુલ પંચાલ, નરેશ પરમાર,  કુણાલ કહાર, પિંકેશ રાઠવાએ સશસ્ત્ર હુમલો કર્યો હોઇ કપૂરાઇ પોલીસ સ્ટેશનમાં હાર્દિકે ફરિયાદ નોંધાવી હતી.તો સામે પક્ષે પિંકેશ રાઠવાએ પણ જાતિવાચક અપમાનિત કરતા ઉચ્ચારણો કરી ચાકુથી હુમલો કર્યાની વળતી ફરિયાદ નોંધાવી હતી.

આ ગુનામાં ક્રાઇમ બ્રાન્ચે નામચીન વિપુલ રમેશભાઇ પંચાલ(ક્રિષ્ણાનગર, ઘાઘરેટિયા)અને નરેશ રાવજીભાઇ પરમાર (ગજ ગણેશ સોસાયટી,વાઘોડિયારોડ)ને ઝડપી પાડી કપૂરાઇ પોલીસને સોપંવાની તજવીજ કરી છે.

પોલીસના જણાવ્યા પ્રમાણે,પકડાયેલા વિપુલ સામે રાયોટિંગ,ધમકી,દારૃ,હદપાર જેવા ૪૦ થી વધુ ગુના નોંધાયેલા છે.