ગોત્રીમાં ગેસના ગોડાઉનમાં કાર લઇ સિલિન્ડર ચોરવા આવેલા ત્રણ પકડાયા

વડોદરાઃ ગોત્રીમાં ગેસના ગોડાઉનમાં સિલિન્ડરો ચોરવા આવેલી ગેંગના ત્રણ સાગરીતોને પોલીસે ઝડપી પાડયા હતા.

ગોત્રીમાં ગાયત્રી સ્કૂલ થી કલાનગરી જવાના માર્ગે આવેલા ગેસ ગોડાઉનમાં એક ગેંગ ચોરી કરવા આવી હોવાની વિગતો મળતાં ગોત્રી પોલીસની વાન ત્યાં પહોંચી હતી.આ વખતે ગોડાઉનની દિવાલ પાસે કાર ઉભેલી હતી અને પોલીસને જોતાં જ લાઇટ બંધ કરી દીધી હતી.

પોલીસે કારની આસપાસ ઉભેલા બે શકમંદ યુવકોની અટકાયત કરી હતી.આ વખતે ત્રીજો એક યુવક દિવાલના બાકોરાંમાંથી બહાર આવતાં તેને પણ પકડવામાં આવ્યો હતો.પોલીસે તપાસ કરતાં બાકોરાની અંદરની બાજુએ સિલિન્ડરો નજરે પડયા હતા.પકડાયેલાઓમાં સાબીર મોકમભાઇ રાઠોડ,ફિરોજ રૃસ્તમભાઇ વાઘેલા અને અયાન ફિરોજભાઇ વાઘેલા(ત્રણેય રહે.સમશેરનગર બોરીયા તળાવ પાસે,કરોડીયારોડ)નો સમાવેશ થાય છે.