હરણી રોડ પરથી રાતે ૩ વાગે ફુલસ્પીડે જતી કારમાંથી ત્રણ પીધેલા યુવકો પકડાયા

વડોદરાઃ હરણીરોડ પર સતત બીજા દિવસે મધરાતે  કારમાં જઇ રહેલા ત્રણ યુવકો દારૃ પીધેલી હાલતમાં મળી આવ્યા હતા.

કારેલીબાગ પોલીસે બે દિવસ પહેલાં જ રાતે બે વાગે બાઇક સવાર ત્રણ યુવકોને દારૃના નશાની હાલતમાં ઝડપી પાડયા હતા. ગઇકાલે રાતે પોલીસ મીરા ચાર રસ્તા પાસે વાહનો ચેક કરી રહી હતી ત્યારે સંગમ સોસાયટી તરફથી એક કાર ફુલસ્પીડમાં આવી રહી હોવાથી  પોલીસે તેને અટકાવી હતી.

પોલીસે અંદર  બેઠેલા યુવકોને તપાસતાં ત્રણેય દારૃ પીધેલી હાલતમાં હતા.જેથી કાર કબજે લઇ ત્રણેયની અટકાયત કરી હતી. પકડાયેલાઓમાં(૧) કાર ચલાવતો ઇન્દ્રજિત પુરૃષોત્તમ સોની(વિશાલ નગર, તરસાલી) (૨) દિગ્વિજયસિંહ ઇન્દ્રજિતસિંહ ગોહિલ અને (૩) હેમંત દેવીદાસ સોનવણે (બંને રહે. રાજાનંદ દ્વેલિંગ,તરસાલી રિંગરોડ) નો સમાવેશ થાય છે.