ગોત્રી રોડ પર ભાડાના મકાનમાં રહેતો વોન્ટેડ આરોપી ઝડપાયો

વડોદરા,રાજપીપળાના પ્રોહિબિશનના ગુનામાં છેલ્લા પાંચ મહિનાથી નાસતા ફરતા આરોપીને એસ.ઓ.જી. ની ટીમે  ગોત્રી રોડના એપાર્ટમેન્ટમાંથી ઝડપી પાડયો છે.

એસ.ઓ.જી.ની ટીમ વિસ્તારમાં પેટ્રોલિંગમાં હતી. તે દરમિયાન માહિતી મળી હતી કે, અમિત ગંગારામ સોલંકી ( રહે. શ્રીજી વંદન એપાર્ટમેન્ટ, અંબિકા નગર પાસે, ગોત્રી) ને વડોદરામાંથી એક વર્ષ માટે તડિપાર કર્યો હોવાછતાંય તે ઘરે આવ્યો છે. જેથી,  પોલીસે તેના ઘરે જઇને તપાસ કરતા અમિત મળી આવ્યો હતો. અમિતને પકડીને કાયદેસરની કાર્યવાહી કરવા માટે ગોત્રી  પોલીસને સોંપવામાં આવ્યો છે. 

જ્યારે અન્ય એક બનાવની વિગત એવી છે કે, રાજપીપળા પોલીસ સ્ટેશનના પ્રોહિબિશનના ગુનામાં વોન્ટેડ આરોપી કરણ ઉર્ફે બટકો જાદવ હાલમાં ગોત્રી રોડ, શ્રીજીવંદન એપાર્ટમેન્ટમાં ભાડાના મકાનમાં રહે છે. જેથી,પી.આઇ. એસ.ડી. રાતડાની સૂચના મુજબ સ્ટાફના જવાનોએ સ્થળ પર જઇને તપાસ કરતા કરણ મળી આવ્યો હતો.  કરણ આણંદ જિલ્લાના ખંભાતનો  રહેવાસી છે. તે છેલ્લા પાંચ મહિનાથી વોન્ટેડ હતો.