રાવપુરા રોડ પરથી બિનવારસી બેગ મળતા પોલીસ દોડતી થઇ

વડોદરા,રાવપુરા રોડ પરથી એક બિનવારસી હાલતમાં મળી આવતા પોલીસ દોડતી થઇ  ગઇ હતી. બોમ્બ સ્કવોડને બોલાવી બેગનું ચેકિંગ કરાવવામાં આવતા કોઇ વાંધાજનક વસ્તુ મળી આવી નહતી.

આજે સાંજે રાવપુરા મેન રોડ પર આવેલી એક દુકાનની બહાર પાર્ક કરેલા મોપેડ પર એક બિનવારસી બેગ મળી આવી હતી. જે બેગ પોતાની નહીં હોવાની જાણ મોપેડ ચાલકે પોલીસને કરી હતી. જેથી, રાવપુરા પોલીસ સ્ટેશનના પી.આઇ. કે.જે.રાણાએ સ્થળ પર દોડી જઇને બેગ શંકાસ્પદ જણાતા રાવપુરા  પોલીસ સ્ટેશનની પાછળ લાવીને મૂકી દીધી હતી. બીજી તરફ ચેકિંગ માટે બોમ્બ ડિસ્પોઝલ સ્કવોડને જાણ કરતા તેઓની ટીમ આવી  ગઇ હતી. બેગમાં કોઇ વિસ્ફોટક પદાર્થ નહી હોવાનું કન્ફર્મ થતા બેગ ખોલીને ચેક કરતા તેમાંથી માત્ર કાગળો મળી આવ્યા હતા. પોલીસે બેગના માલિકની શોધખોળ હાથ ધરી છે.