વહેલી સવારે મોબાઇલની લૂંટ ચલાવી ફરાર થયેલી ત્રિપુટીનો સૂત્રધાર પકડાયો

વડોદરાઃ વહેલી સવારે ચાલતા જતા એક શખ્સનો મોબાઇલ લૂંટનાર ત્રિપુટીનો સૂત્રધાર પકડાઇ જતાં તેની પાસે લૂંટેલો મોબાઇલ મળી આવ્યો છે.

ન્યુ વીઆઇપી રોડ ખાતે ખોડિયારનગર નજીક પીળા વુડાના મકાનમાં રહેતો અને અગાઉ ચોરીના બનાવોમાં પકડાયેલો અજય જેસિંગભાઇ મારવાડી મોબાઇલ વેચવા માટે ફરી રહ્યો હોવાની માહિતી મળતાં પોલીસે વોચ રાખી તેને ઝડપી પાડયો હતો.

અજય પાસે પોલીસે ચોરીનો મોબાઇલ કબજે કર્યો હતો.જે બાબતે પૂછપરછ કરતાં આ મોબાઇલ તેણે બે સાગરીતો સાથે બાઇક પર નીકળ્યો હતો ત્યારે વાઘોડિયા રોડના પરિવાર ચારરસ્તા પાસેથી લૂંટી લીધો હોવાની વિગતો ખૂલી હતી.