નશેબાજ આરોપીએ મળસ્કે માંજલપુર પોલીસ સ્ટેશન માથે લીધું

વડોદરા,માંજલપુર પોલીસે નશેબાજ કાર ચાલકને પકડી તેની સામે ગુનો દાખલ કર્યો હતો. તે નશેબાજનું ઉપરાણું લઇને  એક માથાભારે યુવક દારૃના નશામાં માંજલપુર પોલીસ સ્ટેશન ધસી આવ્યો હતો. તેણે શર્ટ ફાડી નાંખી પોલીસ સાથે ઝપાઝપી પણ કરી પોલીસ સ્ટેશન માથે લીધું હતું. માંજલપુર પોલીસે માથાભારે શખ્સ સામે ગુનો દાખલ કરી તપાસ હાથ ધરી છે.

માંજલપુર  પોલીસે પેટ્રોલિંગ દરમિયાન એક નશેબાજ કાર ચાલક હિમાંશુ સુરેશભાઇ યાદવ (રહે. દિવાળીપુરા સ્લમ ક્વાટર્સની બાજુમાં, તરસાલી) ને તરસાલી બાયપાસ નજીકથી ઝડપી પાડયો હતો. પોલીસે તેની સામે ગુનો દાખલ કરી કાર કબજે લીધી હતી. દરમિયાન મળસ્કે પાંચ વાગ્યે નિપુલ ઉર્ફે ગામડ સુરેશભાઇ પટેલ ( રહે.મારૃતિધામ સોસાયટી, માંજલપુર) માંજલપુર પોલીસ સ્ટેશન ધસી આવ્યો હતો. તેણે પોલીસ સ્ટેશનની બહાર જ ધમાલ શરૃ કરી  દઇ પોલીસ સ્ટેશન માથે લીધું હતું. તેને સમજાવવા જનાર પોલીસ સ્ટાફ સાથે પણ તેને ઝપાઝપી કરી હતી. તેણે પોતાનું શર્ટ પણ ફાડી નાંખી તમાશો કર્યો હતો. જોકે, પોલીસનું કહેવું છે કે, પકડાયેલા નશેબાજ કાર ચાલકનું ઉપરાણું લઇને  નિપુલ પટેલ આવ્યો હતો. તેણે પોલીસ સાથે કોઇ ઝપાઝપી કરી નથી. 

ઉલ્લેખનીય છે કે, નિપુલ પટેલ અગાઉ ધમકીના કેસમાં  પણ સંડોવાયેલો હતો. તે ગુનામાં તેને પકડવાનો બાકી હોવાછતાંય ધરપકડના ડર વિના જ તે દારૃ પીને માંજલપુર  પોલીસ સ્ટેશન ધસી આવ્યો હતો.