કારમાં લઈ જવાતી વિદેશી દારૃની ૭૯૨ બોટલો સાથે ડ્રાઇવર પકડાયો

ચિલોડા નરોડા હાઇવે ઉપર વલાદ બ્રિજ પાસે

પોલીસે ૬.૬૮ લાખનો મુદ્દામાલ કબજે કરીને દારૃ ક્યાં લઈ જવાનો હતો તે જાણવા તપાસ શરૃ કરી

રાજ્યમાં દારૃબંધી હોવા છતાં પરપ્રાંતમાંથી મોટા પ્રમાણમાં વિદેશી દારૃ ઘુસાડવામાં આવી રહ્યો છે અને તેમાં પણ હિંમતનગર ચિલોડા હાઇવે ઉપર આ પ્રકારના દારૃ ભરેલા વાહનો વધુ જોવા મળતા હોય છે ત્યારે ડભોડા પોલીસની ટીમ પેટ્રોલિંગમાં હતી તે દરમિયાન બાતમી મળી હતી કે, ચિલોડા તરફથી આવી રહેલી એક કારમાં વિદેશી દારૃનો જથ્થો ભરેલો છે અને તે નરોડા તરફ જઈ રહી છે જે બાતમીના પગલે પોલીસ ટીમ દ્વારા વલાદ બ્રિજ પાસે વાચ ગોઠવવામાં આવી હતી અને બાતમીવાળી કાર આવતા તેને ઊભી રાખી દેવામાં આવી હતી. જેમાં સવાર ડ્રાઇવરની પૂછપરછ કરવામાં આવતા તે રાજસ્થાન ઉદેપુરના જુવારવા ગામનો સંજય ઈશ્વર જોષીયારા હોવાના જણાવ્યું હતું તેમજ કારમાં તપાસ કરતા વિદેશી દારૃની નાની મોટી ૭૯૨ જેટલી બોટલો મળી આવી હતી. કાર અને દારૃ મળી શકે ૬.૬૮ લાખ રૃપિયાનો મુદ્દામાલ કબજે કરી લીધો હતો. એટલું જ નહીં આ દારૃનો જથ્થો ક્યાંથી લાવવામાં આવ્યો હતો અને કોને આપવાનો હતો તે જાણવા માટે પણ તપાસ શરૃ કરવામાં આવી છે.