સયાજી હોસ્પિટલના પાર્કિંગમાંથી સ્ટાફ નર્સના વાહનોની ચોરી

વડોદરા,સયાજી હોસ્પિટલના પાર્કિંગમાંથી બે સ્ટાફ કર્મચારીઓના વાહનો ચોરાઇ ગયા હતા. અઠવાડિયા સુધી રાહ જોયા પછી પણ વાહન નહીં મળી આવતા  સ્ટાફ નર્સ દ્વારા રાવપુરા  પોલીસ સ્ટેશનમાં ફરિયાદ નોંધાવવામાં આવી છે.

આજવા રોડ સહજ સ્કૂલ  પાસે સાંઇ શ્રદ્ધામાં સોસાયટીમાં રહેતા મનિષાબેન ડાહ્યાભાઇ પરમાર સયાજી હોસ્પિટલમાં સ્ટાફ નર્સ તરીકે નોકરી કરે છે. ગત તા.૩ જી એ તેઓ મોપેડ લઇને સયાજી હોસ્પિટલમાં નોકરી પર જવા નીકળ્યા હતા. સયાજી હોસ્પિટલની જૂની લાયબ્રેરીની સામે પાર્કિંગમાં તેમણે મોપેડ પાર્ક કરી લોક માર્યુ હતું. નોકરી પૂરી કરીને તેઓ પાર્કિંગમાં પોતાનું મોપેડ લેવા પરત આવ્યા ત્યારે તે ચોરી થઇ ગયું હતું.

ન્યૂ વી.આઇ.પી.રોડ ઉપવન હેરિટેજમાં રહેતો જયેન્દ્રસિંહ ખુમાનસિંહ પરમાર સયાજી  હોસ્પિટલમાં સ્ટાફ નર્સ તરીકે નોકરી કરે છે. ગત ૧ લી તારીખે  સવારે આઠ વાગ્યે ઘરેથી નીકળી હોસ્પિટલમાં નોકરી પર ગયો હતો. સયાજી હોસ્પિટલના સીએસએસડી રૃમની પાછળ પાર્કિંગમાં જનરેટર રૃમની પાછળ બાઇક પાર્ક કરીને તે નોકરી પર ગયો હતો.બપોરે અઢી વાગ્યે તે નોકરી પૂરી કરીને પાર્કિંગમાં બાઇક લેવા ગયો ત્યારે તેની બાઇક નહતી. જે અંગે રાવપુરા પોલીસે ગુનો દાખલ કરી કાયદેસરની કાર્યવાહી હાથ ધરી છે.