1 કિલો RDX લઈને અકોટા ગણપતિ મંદિર પાસે ઉભો છું...પીધેલાએ પોલીસને દોડાવી

Vadodara News : વડોદરામાં ગઈ મોડી રાત્રે નશામાં છાકટા બનેલા એક યુવકે પોલીસને દોડતી કરી હતી. ચારે બાજુ દોડતી થયેલી પોલીસે યુવકને ઝડપી પાડ્યો ત્યારે તે નશામાં ઝૂમી રહ્યો હતો. 

વડોદરા શહેર પોલીસ કંટ્રોલ રૂમને રાત્રે 10:35 કલાકે એક કોલ આવ્યો હતો. જેમાં ફોન કરનારે હું એક કિલો આરડીએક્સ લઈને અકોટા ગણપતિ મંદિર પાસે ઉભો છું... તેમ કહ્યું હતું અને ફોન કટ કરી દીધો હતો. 

બનાવની ગંભીરતા જોતા પોલીસ કંટ્રોલ રૂમે તમામ ઉચ્ચ અધિકારીઓને જાણ કરી હતી અને અકોટા પોલીસને તાત્કાલિક તપાસ કરવા સૂચના આપી હતી. જેને પગલે અકોટાના પી.આઈ. એ જુદી જુદી ટીમો બનાવી મોબાઈલ લોકેશનના આધારે સર્ચ કર્યું હતું.

પોલીસ જ્યારે કોલ કરનાર સુધી પહોંચી ત્યારે તે ગણપતિ મંદિર પાસે નશામાં ચૂર હાલતમાં મળી આવ્યો હતો. તેનું નામ ક્રિષ્ના ભવાનીરામ સંતોલીયા (સુધરાઈ કોલોની અકોટા મૂળ  પીયોરગઢ, ઉત્તરાખંડ) હોવાનું જણાઈ આવ્યું હતું. જેથી તેની પોલીસને ખોટી માહિતી આપવા બદલ તેમજ દારૂના કેસ બદલ ધરપકડ કરવામાં આવી હતી.