ભાલેજમાં જુગાર રમતા છ શખ્સો ઝડપાયા, બે ફરાર

૪૫ હજારનો મુદ્દામાલ જપ્ત કરી તમામ સામે ગુનો નોંધ્યો 

આણંદ: ઉમરેઠ તાલુકાના ભાલેજ ગામની મદની કોલોની નજીક પત્તાપાનાનો જુગાર રમતા છ શખ્શોને ભાલેજ પોલીસે ઝડપી પાડયા હતા. જ્યારે બે ફરાર થઈ ગયા હતા. પોલીસે રૂા.૪૫ હજાર ઉપરાંતનો મુદ્દામાલ જપ્ત કરી કાયદેસર કાર્યવાહી હાથ ધરી છે.  ભાલેજની મદની કોલોની નજીક આવેલી ખુલ્લી જગ્યામાં કેટલાક શખ્શો એકત્ર થઈ પત્તાપાનાનો જુગાર રમી રહ્યા હોવાની બાતમી ભાલેજ પોલીસને મળી હતી. જેના આધારે પોલીસે બુધવારે સાંજે દરોડો કરી જાવેદખાન ઉર્ફે ટોપી ફરીદખાન પઠાણ, રશીદમીંયા ઉર્ફે બચ્ચો યુસુફમીંયા મલેક, શબ્બીરમીંયા ઉર્ફે ટેલર અહેમદમીંયા મલેક, નિસારમીંયા ઉર્ફે કલેજા યુસુફમીંયા મલેક, સલીમખાન ઉસ્માનખાન પઠાણ અને ઈમરાન ઉર્ફે બકરી મહેમુદખાન પઠાણને ઝડપી પાડયા હતા. જ્યારે કબીરમીંયા ઉર્ફે ગાંગુલી સલીમમીંયા મલેક અને ઈમરાન બચુખાન પઠાણ નાસી છુટયા હતા. પોલીસે રોકડા રૂા.૨૬,૨૪૦ તથા પાંચ મોબાઈલ મળી રૂા.૪૫,૭૪૦નો મુદ્દામાલ જપ્ત કરી તમામ વિરૂદ્ધ ગુનો નોંધી વધુ તપાસ હાથ ધરી છે.