રાવપુરા જોગીદાસ વિઠ્ઠલની પોળમાં કાચની બોટલ પડતા તંગદિલી

વડોદરા,રાવપુરા જોગીદાસ વિઠ્ઠલની  પોળમાં આજે સાંજે બોટલ આવતા તંગદિલી સર્જાઇ હતી. કારેલીબાગ પોલીસને મેસેજ મળતા પોલીસ ઘટના સ્થળે દોડી ગઇ હતી. પોલીસ પહોંચ્યા પછી વિસ્તારમાં સન્નાટો છવાઇ ગયો હતો.

નાગરવાડમાં રહેતા ભાજપના પૂર્વ કોર્પોરેટરના  પુત્ર તપન પરમારની હત્યા પછી સમગ્ર વિસ્તારમાં  તંગદિલી છે. પોલીસ દ્વારા સતત પેટ્રોલિંગ શરૃ કરવામાં આવ્યું હતું. આજે સાંજે સાત વાગ્યે રાવપુરા રોડ જોગીદાસ વિઠ્ઠલની પોળમાં રહેતા ઇશ્વરભાઇ ઘરે જમતા હતા. તે દરમિયાન કાચની એક બોટલ આવીને પડતા તેઓ ઘરની બહાર દોડી આવ્યા હતા. વિસ્તાર સંવેદનશીલ હોવાથી પોલીસને જાણ કરવામાં આવી હતી. કારેલીબાગ  પોલીસ ઘટના સ્થળે દોડી ગઇ હતી. પોલીસે સમગ્ર વિસ્તારમાં ફૂટ પેટ્રોલિંગ હાથ ધર્યુ હતું. જોકે, આ બોટલ ભૂલથી આવી ગઇ  હોવાનું અનુમાન હાલમાં સેવાઇ રહ્યું છે.