આજવા રોડની લૂંટમાં આરોપીઓને ઝડપી પાડવા પોલીસની દોડધામ

વડોદરા, આજવા રોડની નવજીવન સોસાયટીમાં પરિવારને બાનમાં લઈ લૂંટ કરનાર આરોપીઓને ઝડપી પાડવા માટે પોલીસ દ્વારા તપાસ કરવામાં આવી રહી છે. પરંતુ,  હજી સુધી કોઇ આરોપી હાથમાં આવ્યો નથી.

આજવા રોડ પર મોડી રાત્રે ત્રણ વાગ્યે ત્રાટકેલા લૂંટારાઓએ ફેક્ટરી માલિકના પરિવારને બાનમાં લઇ સોનાના ૨૦ તોલા દાગીના, બે કિલો ચાંદી તથા રોકડા અઢી લાખની લૂંટ ચલાવી હતી. ગણતરીની મિનિટોમાં લૂંટને અંજામ આપી આરોપીઓ ભાગી ગયા હતા. ડીસીપી પન્ના મોમાયાની સૂચના મુજબ,  પી.આઇ. એમ.આર. સંગાડાએ તપાસ શરૃ કરી છે. પોલીસની તપાસમાં એવી શક્યતા સેવાઇ ર હી છે કે,  લૂંટારાઓ જાણભેદૂ  હોઇ શકે. ઘરમાં આટલું સોનુ, ચાંદી અને રોકડ રકમ હોવાની જાણ અન્ય કોને  હતી ? તે અંગે પોલીસે તપાસ શરૃ કરી છે. દરમિયાન લૂંટમાં વપરાયેલી કાર હાઇવે પરથી બિનવારસી મળી આવી છે. આરોપીઓ હાઇવેથી અન્ય વાહનમાં ભાગી છૂટયા છે. તેની વિગતો મેળવવા માટે  પોલીસ દ્વારા સીસીટીવીના ફૂટેજની ચકાસણી કરવામાં આવી રહી છે.