તરસાલીના યુવા સિવિલ કોન્ટ્રાક્ટરની હત્યાના કેસમાં પોલીસે 1400 પાનાની ચાર્જશીટ મુકી

વડોદરા : ઉછીના આપેલા રૃ. એક લાખ પરત આપવા ના પડે તે માટે જીમ ટ્રેનરે સિવિલ કોન્ટ્રાક્ટર મિત્રને ઘરે બોલાવીને ક્રુર રીતે હત્યા કરી નાખી હતી જે બાદ જીમ ટ્રેનરે માતા સાથે મળીને લાશને કેનાલમાં ફેંકી દીધી હતી. આ કેસમાં પોલીસે ૪ મહિના અને ૨૧ દિવસ બાદ કોર્ટમાં ૧૪૦૦ પાનાની ચાર્જશીટ મુકી છે.

જીમ ટ્રેનર અને તેની માતાએ લાશને બાઇકના કવરમાં લપેટીને રાઘવપુરા ગામ નજીક કેનાલમાં ફેંકી દીધી હતી, 15 દિવસે લાશ મળી હતી

હત્યા બાદ સતીષ અને તેની માતા આઠુબેન મોતિભાઇ વસાવા (ઉ.૬૧)એ જીમીની લાશને બાઇકના કવરમાં બંધ કરી હતી અને જીમીની જ બાઇક ઉપર કુંઢેલા રાઘવપુરા ગામની સીમમાં શાખા કેનાલના નાળામાં લાશને ફેંકી દીધી હતી. બાઇક સતીષ ચલાવતો હતો અને પાછળ તેની માતા લાશને પકડીને બેઠી હતી.  આ કેસમાં મકરપુરા પોલીસે ૬૮ સાહેદોના નિવેદનો નોંધ્યા છે.