વાસણા - ભાયલી રોડ પર મહિલાના ગળામાંથી અછોડો તૂટયો

વડોદરા.વાસણા - ભાયલી રોડ પર મોપેડ પર જતી મહિલાના ગળામાંથી સોનાનો અછોડો તોડીને બાઇક સવાર આરોપીઓ ફરાર થઇ  ગયા હતા. જે અંગે તાલુકા  પોલીસે વધુ તપાસ હાથ ધરી છે.

ગોત્રીમાં રહેતા ઉષાબેન મહેતા ઘરકામ કરે છે. ગત ૨૪મી તારીખે રાતે આઠ વાગ્યે તેઓ બહેનપની જીગીશાબેન પીયૂષભાઇ વઘાસીયા ( રહે.શ્રીમ ગેલેક્સી, વાસણા - ભાયલી  રોડ) સાથે અલગ - અલગ મોપેડ લઇને પોલો ગ્રાઉન્ડમાં તિબેટિયન માર્કેટમાં ગયા હતા. ત્યાંથી કામ  પતાવીને તેઓ ઘરે આવવા માટે નીકળ્યા હતા. સાડા દશ વાગ્યે તેઓ વાસણા -  ભાયલી કેનાલ રોડ પરથી પસાર થતા હતા. તે દરમિયાન પાછળથી એક બાઇક પર બે આરોપીઓ કાળા કલરનું સ્વેટર અને મોંઢા પર  કાળા કલરનું માસ્ક પહેરીને આવ્યા હતા. બાઇકની પાછળ બેસેલા આરોપીએ ઉષાબેનના ગળામાંથી ૫૦  હજારની કિંમતની સોનાની ચેન તોડી લીધી હતી. બંને બહેનપણીઓએ આરોપીઓનો  પીછો કર્યો હતો. પરંતુ, આરોપીઓ ભાગી જવામાં સફળ થયા હતા.