ઉંડેરાના માથાભારે કિશનગિરિએ ઉત્પાત મચાવ્યો, કાકા-કઝીન અને દુકાનદાર પર હિંસક હુમલો

વડોદરાઃ ઉંડેરા વિસ્તારના કિશનગિરિ નામના માથાભારે શખ્સે ધારદાર ચાકુ વડે કાકા,કઝીન અને હેરસલૂનના સંચાલક પર આડેધડ હુમલા કરતાં પોલીસે તેને ઝડપી પાડયો છે.

ઉંડેરાના જલારામનગરમાં રહેતો કિશનગિરી સુનિલગિરિ ગઇરાતે ઇન્દિરા નગર વિસ્તારમાં ફેશન હેર કટ નામની દુકાને ગયો હતો અને સંચાલક હસામુદ્દીનને અસ્ત્રો બરાબર માર્યો નથી તેમ કહી ગાળો ભાંડી હાથનુંકડું માથામાં ફટકાર્યું હતું.દુકાનદાર સારવાર માટે ગયો ત્યારે કિશનગિરિ ફરી દુકાને આવ્યો હતો અને ઇજાગ્રસ્ત હસામુદ્દીનના ભાઇ નઝમુદ્દીનની પાછળ હુમલો કરવા દોડયો હતો.જે અંગે જવાહરનગર પોલીસે ગુનો નોંધ્યો હતો.

ઉપરોક્ત બનાવ બાદ આજે બપોરે ત્રણેક વાગે કિશનગિરિ ગોરવા પંચવટી સર્કલ પાસે તેના પિતા સુનિલગિરિની શાકભાજીની લારી પર આવ્યો હતો અને રૃપિયા માંગ્યા હતા. પિતાએ પૈસા નહિં આપતાં તેણે ગાળો ભાંડી હતી.જેથી નજીકમાં લારી ધરાવતા તેના કાકા રાજનગિરિએ તેને રોકતાં કિશને તેમના પર ચાકુના ઘા ઝીંક્યા હતા.આ દરમિયાન તેનો કઝીન સૌરવગિરિ વચ્ચે પડતાં તેના પર પણ ઘા ઝીંકી હત્યાનો પ્રયાસ કર્યો હતો.

ગોરવા પોલીસે હત્યાના પ્રયાસ બદલ આજે કિશનગિરિને ઝડપી પાડયો હતો.જ્યારે હવે જવાહરનગર પોલીસ તેની ધરપકડ કરનાર છે.