શાહપુર પાસે કારની અડફેટે રસ્તો ઓળંગતા આધેડનું મોત નિપજ્યું

ગાંધીનગરમાં વધતા જતા અકસ્માતો વચ્ચે

હોટલમાં કામ કરીને ઘરે પરત જઈ રહ્યા હતા તે દરમિયાન કાર ચાલકે અકસ્માત સર્જ્યો

ગાંધીનગર :  ગાંધીનગર શહેર નજીક શાહપુર ગાંધીનગર માર્ગ ઉપર ગઈકાલે રાત્રિના સમયે રસ્તો ઓળંગી રહેલા શાહપુર ગામના આધેડને પૂર ઝડપે જઈ રહેલી કારે અડફેટે લેતા શરીરે ગંભીર ઈજાઓ પહોંચી હતી અને તેમનું મોત થયું હતું. જે ઘટના સંદર્ભે ડભોડા પોલીસે કાર ચાલક સામે ગુનો દાખલ  કર્યો  છે.

પાટનગર ગાંધીનગર શહેર તેમજ આસપાસના માર્ગો ઉપર અકસ્માતની ઘટનાઓ વધી રહી છે ત્યારે ગઈકાલે રાત્રે શાહપુર પાસે સર્જાયેલા વધુ એક અકસ્માતમાં આધેડનું મોત થયું છે. જે ઘટના સંદર્ભે પોલીસ સૂત્રોમાંથી મળતી વિગતો પ્રમાણે શાહપુર ગામમાં રહેતા નંદુભાઈ શીવાભાઈ વાંસફોડા શાહપુર પાસે આવેલી હોટલમાં નોકરી કરતા હતા અને ગઈકાલે સવારના સમયે તેઓ રાબેતા મુજબ હોટલમાં ગયા હતા. આ દરમિયાન રાત્રિના ૧૦.૩૦ વાગ્યાના સુમારે નંદુભાઈ હોટલનું કામ પૂરું કરીને રસ્તો ઓળંગીને ઘર તરફ જઈ રહ્યા હતા તે દરમિયાન પૂર ઝડપે આવી રહેલી કારે તેમને અડફેટ લીધા હતા અને ગંભીર ઇજાગ્રસ્ત કર્યા હતા. જેના પગલે ત્યાં હાજર લોકોએ તેમને ઓળખી જતા તુરંત જ તેમના પુત્ર રજનીકાંતને ફોન કર્યો હતો અને તે પણ પરિવાર સાથે ત્યાં સ્થળ ઉપર પહોંચી ગયો હતો. જ્યાં ગંભીર રીતે ઘાયલ પિતાને સારવાર માટે ૧૦૮ એમ્બ્યુલન્સ મારફતે ગાંધીનગર સિવિલ હોસ્પિટલ લઈ જવામાં આવ્યા હતા પરંતુ ફરજ પરના તબીબે તેમને મૃત જાહેર કર્યા હતા. આ અકસ્માતની ઘટના સંદર્ભે ડભોડા પોલીસ દ્વારા કારના ચાલક સામે ગુનો દાખલ કરીને વધુ તપાસ શરૃ કરવામાં આવી હતી.