ઇન્ડિયા બુલ્સ કંપનીમાં રોકાણ કરવાના બહાને 20 લોકો સાથે રૂ.1.46 કરોડની ઠગાઈ

imgae : Filephoto

Vadoara Fraud Case : વડોદરા સુભાનપુરા ઇલોરા પાર્ક વિસ્તારમાં રહેતા સોફ્ટવેર મેનેજર તેમના પરિવારના સભ્યો, સગા સંબંધીઓ તથા મિત્રો 20 ઉપરાંતના લોકોએ ક્રેડિટબુલ્સ ઇન્ડિયા કંપનીમાં સારા વળતરની લાલચે રૂપિયા 1.46 કરોડનું રોકાણ કર્યું હતું. પરંતુ કંપનીએ શરૂઆતમાં વિશ્વાસ કેળવવા માટે દોઢથી બે ટકા લેખે વળતર નિયમિત ચૂકવ્યું હતું. ત્યારબાદ વળતર આપવાનું બંધ કરવા સાથે રોકાણ કરેલા રૂપિયા પણ પરત નહીં કરી ત્રણ શખ્સો દ્વારા ઠગાઈ આચરવામાં આવી હતી. જેથી ગોરવા પોલીસ સ્ટેશનમાં ફરિયાદ નોંધાવવામાં આવી છે. 

વડોદરા શહેરના સુભાનપુરા ઇલોરા પાર્ક વિસ્તારમાં આવેલી શ્રીવીલા સોસાયટીમાં રહેતા જનક નરોત્તમભાઈ મકવાણાએ પોલીસ ફરિયાદ નોંધાવી છે કે હું સોફ્ટવેર મેનેજર તરીકે નોકરી છું. મારે શેરબજાર તથા અન્ય સંસ્થા ખાતે નાણાનું રોકાણ કરવાનું હોય જેથી મેં વર્ષ 2021માં ઇન્વેસ્ટમેન્ટ એન્ડ મંથલી રીટર્ન ગુગલમાં સર્ચ કરતા ક્રેડિટ બુલ્સ ઇન્ડિયાની વેબસાઇટ આવી હતી. જેના ઉપર મેં કલીક કરી તેમાં મારી માહિતી ભરતા કંપનીના ડાયરેક્ટર ધવલ સોવાણી તથા તેમના પાટર્નર તરીકે ફરઝાના ઈરફાન અહેમંદ શેખ તથા પ્રકજ પ્રવીણભાઈ વડગામા (રહે-જામનગર) રીજનલ હેડ તરીકે ફરજ બજાવતા હતા. મને કંપની રોકાણ કરવા માટે સારી લાગતા તેના ત્રણ પ્લાન ગોલ્ડ, સિલ્વર, પ્લેટીનિયમ વિશે ઓનલાઈન માહિતી મેળવી હતી. મેં એક વર્ષના પ્રીરીયડ માટે રોકાણ જોતા તેમાં રૂ.1 લાખના રોકાણ સામે માસીક 1.5% વળતર આપતા હોય કંપની પર વિશ્વાસ આવી ગયો હતો અને સૌપ્રથમ મારા બિના જનકકુમાર મકવાણાના નામથી એક લાખનું રોકાણ કરતા તેના પર અમને આ કંપની તરફથી માસિક 1500 રૂપિયા આપતા એમના પર મને વધુ વિશ્વાસ આવી ગયો હતો અને મારા, મારા પત્ની તથા માતાના નામ પર રૂ.32.50 લાખનું રોકાણ કર્યું હતું. જેના પર તેઓ 2 ટકા વળતર આપવા જણાવ્યું હતું. પરંતુ આ ક્રેડિટ બુલ્સ ઈન્ડીયા ડોટ કોમ કંપની તરફથી અમને ફેબ્રુઆરી 2024થી માસીક વળતર ચુકવવાનુ બંધ કરી દિધું છે. જેથી તેઓના ઈ-મેઈલ આઈ.ડી તથા ફોન ૫ર ફોન કરતા આ ક્રેડિટ બુલ્સ ઈન્ડીયા ડોટ કોમ કંપની તરફથી અમને  સેબીની ઇન્ક્વાયરી શરૂ હોય જે થી તમોને ફેબ્રુઆરી-૨૦૨૪ના માસનુ વળતર આપી શકીએ તેમ નથી તેમ જણાવ્યું હતું.

ત્યારબાદ આ ક્રેડીટ બુલ્સ ઈન્ડીયા ડોટ કોમ કંપનીની ઓફિસ જામનગર ખાતે જઈ તપાસ કરતા ક્રેડીટ બુલ્સ ઈન્ડીયા ડોટ કોમ કંપનીની ઓફીસ ખાતે જઈ યશ સોલાણી તથા પંકજને અમે 32.50 લાખનું રોકાણના વળતર બાબતે કહેતા બે અઠવાડીયામાં પરત આપી દઇશું તેમ જણાવ્યું હતું, પરંતુ આજ દિન સુધી વળતર કે અમારા ભરેલા રૂપિયા પરત ચૂકવ્યા નથી. ઉપરાંત મારા સગા સંબંધી તથા મિત્રએ પણ આ ક્રેડિટ બુલ્સ ઈન્ડીયા ડોટ કોમ કંપનીમાં રૂ.1.14 કરોડ અલગ-અલગ ટર્મમાં રોકાણ કર્યા હતા પરંતુ તેમને પણ વળતર તથા રૂપિયા પરત નહિ કરી અમારી સાથે ક્રેડિટ બુલ્સ ઇન્ડિયા કંપનીના નામે ધવલ સોલાણી ફરજાના શેખ અને પંકજ વડગામાએ રૂ.1.46 કરોડની છેતરપિંડી આચરી છે.