દિવાળીના મીની વેકેશનમાં સ્ટેચ્યૂ ઓફ યુનિટિ ખાતે ૪ લાખ પ્રવાસીઓ ઉમટયા

રાજપીપળા,તા.૫

દિવાળીના મીની વેકેશનમાં સ્ટેચ્યુ ઓફ યુનિટિ ખાતે ૪ લાખથી વધુ પ્રવાસીઓ ઉમટી પડયા હતા. દિવાળીના મીની વેકેશનમાં પ્રવાસીઓની સૌથી પહેલી પસંદગી સ્ટેચ્યૂ ઓફ યુનિટિ કેવડિયા જ હોય છે.

કેવડિયામાં ૬ વર્ષમાં ૧.૫૦ કરોડથી પણ વધુ પ્રવાસીઓ નોંધાઇ ચૂકયા છે. આ વખતે દિવાળીની રજાઓમાં સ્ટેચ્યુ ઓફ યુનિટિ હાઉસફૂલ જોવા મળ્યુ હતું. તા.૧ નવેમ્બરથી તમામ હોટેલો, ટેન્ટસિટિ, રો હાઉસ ભરચક થયા છે. ટેન્ટસિટિમાં આ દિવાળીમાં પ્રવાસીઓ માટે સ્પેશિયલ આદિવાસી ફૂડ ઉપરાંત રાત્રે સાંસ્કૃતિક પ્રોગ્રામની પણ વ્યવસ્થા કરવામાં આવી હતી.

રોજ ૫૦ હજારથી વધુ પ્રવાસીઓ આવતા એસ.ટી. તંત્ર દ્વારા સ્પેશિયલ એસટી બસો મુકવામાં આવી હતી. લોકો સ્ટેચ્યુ ઓફ યુનિટિ પર પસંદગી ઉતારતા હોવાથી તંત્ર દ્વારા સુવિધાઓમાં પણ વધારો કરાયો છે.