દુમાડના ચાર શખ્સો ચોરીની બે બાઇક, મોબાઇલો સાથે ઝડપાયા

વડોદરા, તા.24 વડોદરા શહેરના સમા વિસ્તારમાંથી બે બાઇક તેમજ સાત મોબાઇલની ચોરી કરીને તેને વેચવા માટે ફરતા દુમાડ ગામના ચાર યુવાનોને જિલ્લા પોલીસે ઝડપી પાડયા  હતાં.

આ અંગેની વિગત એવી છે કે મંજુસર જીઆઇડીસીના ગેટ-૨ પાસે ચાર શખ્સો બે બાઇક તેમજ મોબાઇલ વેચાણ માટે ઊભા છે અને ગ્રાહકો શોધવા માટે પૂછપરછ કરે છે તેવી માહિતીના આધારે મંજુસર પોલીસે ચાર શખ્સોને બે બાઇક સાથે ઝડપી પાડયા હતાં. ઝડપાયેલા ચારેય શખ્સોએ ત્રણ મહિના પહેલા એક બાઇક સમા-સાવલીરોડ પર સિધ્ધાર્થ એનેક્ષના બેઝમેન્ટના પાર્કિગમાંથી તેમજ બીજી બાઇક સમા-સાવલીરોડ પર લોટસ ઓરા-૨ના બેઝમેન્ટના પાર્કિગમાંથી ચોરી કરી હોવાની કબૂલાત કરી હતી.

આ ઉપરાંત તેઓની પાસેથી સાત મોબાઇલ પણ મળ્યા હતા જે સમા વિસ્તારમાંથી વિવિધ સ્થળોએથી ચોરી કર્યા હતાં. પોલીસે ચોરીની બે બાઇક અને સાત મોબાઇલ સાથે પ્રતિક મુકેશભાઇ ચૌહાણ (રહે.દુમાડ), ધવલ ફુલાભાઇ પટેલ (રહે.મોટુ ફળિયું, દુમાડ), મિતેષ અશોકભાઇ પરમાર (રહે.રામદેવ ફળિયું, દુમાડ) અને યોગેન્દ્ર વિઠ્ઠલસિંહ ચાવડા (રહે.નાનો ભાગ, દુમાડ)ની ધરપકડ કરી ચારેયની વધુ પૂછપરછ હાથ ધરી છે.