યુનિ.ના ૪૫,૦૦૦ વિદ્યાર્થીઓના દિવાળી વેકેશનનો આજથી પ્રારંભ

વડોદરાઃ એમ.એસ.યુનિવર્સિટીના ૪૫૦૦૦ જેટલા વિદ્યાર્થીઓના દિવાળી વેકેશનનો આવતીકાલ, સોમવારથી સત્તાવાર રીતે પ્રારંભ થશે.

સ્કૂલોમાં ૯ નવેમ્બરથી વેકેશન શરુ થવાનુ છે અને સ્કૂલોના વિદ્યાર્થીઓને ૨૧ દિવસનુ વેકેશન મળશે ત્યારે યુનિવર્સિટીના વિદ્યાર્થીઓને ૨૩ દિવસનુ વેક્ેશન મળ્યુ છે.હવે યુનિવર્સિટીમાં શૈક્ષણિક કાર્યનો ૨૮ નવેમ્બરથી પ્રારંભ થશે.આમ તો ઓક્ટોબર મહિનાના અંતથી જ કેમ્પસમાં દિવાળી વેકેશનનો માહોલ જોવા મળી રહ્યો હતો.નવેમ્બરના પહેલા સપ્તાહના ચાર જ દિવસ શિક્ષણ કાર્ય થયુ હતુ અને એ પછી શનિવાર અને રવિવાર આવી ગયો હતો.

વિદ્યાર્થીઓની સાથે સાથે બિન શૈક્ષણિક કર્મચારીઓને નવ દિવસની રજા મળે તેવી શક્યતા છે.કારણકે બિન શૈક્ષણિક સ્ટાફની રજાઓ ૧૧ નવેમ્બરે બીજો શનિવાર હોવાથી શરુ થશે.સરકારે સોમવારે ખાલી દિવસે રજા જાહેર કરી છે અને તા.૧૫ નવેમ્બર સુધી સત્તાવાર રીતે રજા છે.વાઈસ ચાન્સેલર ૧૬ થી ૧૮ નવેમ્બર સુધી પોતાનો અધિકાર વાપરીને રજા જાહેર કરી શકે છે.૧૯ નવેમ્બરે રવિવારની રજા છે.

રજાઓ જાહેર થતાની સાથે જ યુનિવર્સિટીની હોસ્ટેલો પણ લગભગ ખાલી થઈ ચુકી છે.વિદ્યાર્થીઓ દિવાળી માટે વતન રવાના થઈ ગયા છે.