મહુડી ગામે મંદિરમાં પૂજા કરવા બાબતે વૃદ્ધ પર જીવલેણ હુમલો

મંદિરમાં કેમ આવ્યો છો તેમ કહેતા મામલો બિચક્યો : પોલીસે ફરિયાદ નોંધી તપાસ આદરી

 માણસા તાલુકામાં આવેલ સુપ્રસિદ્ધ મહુડી ગામે રાવળ વાસમાં રહેતા અને શાકભાજી નો ધંધો કરી પરિવારનું ગુજરાન ચલાવતા ૨૯ વર્ષીય મહેશભાઈ ગાંડાભાઈ રાવળ ગઈકાલે બપોરે તેમના ઘરની બાજુમાં આવેલા બ્રહ્માણી માતાજીના મંદિરમાં શ્રીફળ વધેરવા માટે ગયા હતા તે વખતે તેમના વાસમાં વહેતો ૨૦ વર્ષીય હાદક ઉર્ફે જીગો વિક્રમભાઈ રાવળ મંદિરમાં આવી મહેશભાઈને કહેવા લાગ્યો હતો કે તું મંદિરમાં કેમ આવ્યો તેવું કહી ઝઘડો કરી ઉશ્કેરાઈ જઈ અહીં પડેલા સેન્ટીંગના ટેકામાં વપરાતો લાકડાનો ધોકો મારવાની કોશિશ કરતા હોબાળો થયો હતો જેથી મહેશભાઈના ૬૦ વર્ષીય પિતા મંદિરમાં આવી ગયા હતા અને તેઓ વચ્ચે છોડાવા જતા હાદકે જાનથી મારી નાખવાના ઇરાદે વૃદ્ધના માથામાં લાકડાના ધોકા નો ફટકો મારતા તેઓ ત્યાં જ બેભાન થઈ ઢળી પડયા હતા.

 આ વખતે આજુબાજુમાંથી દોડી આવેલા લોકોને જોઈ હુમલાખોર ત્યાંથી ભાગી ગયો હતો બીજી બાજુ ઇજાગ્રસ્ત વૃદ્ધને પ્રથમ માણસા અને ત્યારબાદ વધુ સારવાર માટે અમદાવાદ લઈ જવામાં આવ્યા હતા જે બાબતે ઇજાગ્રસ્તના પુત્ર મહેશભાઈએ હુમલાખોર હાદક ઉર્ફે જીગો વિક્રમભાઈ રાવળ વિરુદ્ધ માણસા પોલીસ સ્ટેશને ફરિયાદ આપતા પોલીસે હત્યાના પ્રયાસનો ગુનો નોંધી કાયદેસર કાર્યવાહી હાથ ધરી છે.