કીર્તિસ્થંભ નજીક રોંગ સાઇડ આવતા પોલીસે દંપતીને અડફેટે લીધું

વડોદરા, કીર્તિ સ્થંભ નજીક રોંગ સાઇડ બાઇક ચલાવતા  પોલીસ કર્મચારીએ બાઇક સવાર દંપતીને અડફેટે લીધું હતું. અકસ્માત પછી ભાગી છૂટેલા પોલીસ કર્મચારીની સામે કાર્યવાહી કરવા માટે સામાજિક કાર્યકરે માંગણી કરી છે.

મળતી માહિતી મુજબ,ગોધરામાં રહેતા જીમી શાહ તેમની સગર્ભા પત્ની હેમિની બેનને લઇને દવાખાનામાં ચેક અપ માટે જતા હતા. સવારે સાડા આઠ વાગ્યે તેઓ કીર્તિ સ્થંભ નજીકથી પસાર થતા હતા. તે સમયે રોંગ સાઇડ બાઇક લઇને આવેલા પોલીસ કર્મચારીએ અકસ્માત કરતા દંપતી નીચે પટકાયું હતું. ઇજાગ્રસ્ત દંપતીને સારવાર માટે હોસ્પિટલમાં લઇ જવાની દરકાર કર્યા વિના જ પોલીસ કર્મચારી ભાગી ગયો હતો. સગર્ભા યુવતી નર્સ તરીકે નોકરી કરે છે. સામાજિક કાર્યકરે એવો આક્ષેપ કર્યો હતો કે, આ પોલીસ કર્મચારી દારૃના નશામાં હતો.