કલોલ મામલતદાર કચેરીમાં કારકુન 500ની લાંચ લેતાં રંગેહાથ ઝડપાયો

એસીબીની ટ્રેપથી કચેરીમાં સન્નાટો છવાયો

હંગામી કર્મચારી તરીકે ફરજ બજાવતા મનોજ દરજીએ અરજદાર પાસેથી જમીનના કામ માટે લાંચ માંગી

કલોલ :  કલોલની મામલતદાર કચેરીમાં હંગામી ક્લાર્ક તરીકે ફરજ બજાવતા મનોજ દરજી ૫૦૦ રૃપિયાની લાંચ લેતા રંગે હાથે ઝડપાઈ ગયા હતા જેને પગલે એસીબીએ તેની ધરપકડ કરી આગળ તપાસ હાથ ધરી છે. અગાઉ પણ એસીબીએ છટકું ગોઠવી મામલતદાર, નાયબ મામલતદાર અને કોમ્પ્યુટર ઓપરેટરને લાંચ લેતા ઝડપી લીધા હતા.

કલોલ મામલતદાર કચેરીમાં અરજદારે નાના સરખા કામ માટે પણ અધિકારી અને કર્મચારીઓને નાણાં આપવા પડતા હોવાની વાત જગજાહેર છે. કોઈપણ અરજદાર કામ માટે જાય તો અનેક ધક્કા ખવડાવવામાં આવે છે. નાણાં વગર કોઈપણ કામ થતું ન હોવાથી અરજદારોની કફોડી હાલત થઈ છે ત્યારે મંગળવારે મામલતદાર કચેરીમાં એસીબીએ છટકું ગોઠવી વધુ એક કર્મચારીને દબોચી લીધો છે.

કલોલની મામલતદાર કચેરીમાં મનોજ દરજી નામનો કર્મચારી છેલ્લા કેટલાય સમયથી હંગામી તરીકે કામગીરી કરે છે. મામલતદાર કચેરીમાં જમીનોને વહીવટ મનોજ દરજી જ કરતો હોવાનું લોકોએ જણાવ્યું હતું. નાણાં લઈને આ કર્મચારી કામ ન કરતો હોવાની પણ અરજદારોમાં ચર્ચા હતી. મામલતદાર કચેરીમાં એક અરજદાર પોતાનું કામ લઈને આવતા કારકુને રૃપિયાનો વહીવટ કરવાનું જણાવ્યું હતું. જેને પગલે અરજદાર નાણાં આપવા માંગતા ન હોઈ એસીબીનો સંપર્ક કર્યો હતો.જેને પગલે એસીબીએ કલોલ મામલતદાર કચેરીમાં છટકું ગોઠવી લાંચ લેતા કારકુનને દબોચી લીધો હતો. એસીબી દ્વારા કાર્યવાહી કરવામાં આવતા કર્મચારીઓમાં ફફડાટ વ્યાપી ગયો હતો.