પતિ સાથે બાઈક ઉપર જઈ રહેલી યુવતીનો દુપટ્ટો ખેંચી છેડતી : બે શખ્સો ફરાર

ગાંધીનગર કોબા હાઇવે ઉપર રોમિયોનો ત્રાસ

અમદાવાદથી પરત ફરી રહેલા ગાંધીનગરના દંપતીને કડવો અનુભવ : અભદ્ર ઈશારા કરનાર યુવાન સામે પોલીસ ફરિયાદ

ગાંધીનગર :  ગાંધીનગરમાં રોમિયોનો ત્રાસ વધી રહ્યો છે ત્યારે ગાંધીનગરનું દંપતી બાઈક પર અમદાવાદથી પરત ફરી રહ્યું હતું ત્યારે કોબા હાઈવેના ભાઈજીપુરા પાસે બાઈક ઉપર આવેલા બે શખ્સો પૈકી પાછળ બેઠેલા શખ્સે મહિલા સાથે અભદ્ર ઈશારા કરીને દુપટ્ટો ખેંચ્યો હતો. જોકે રોમિયો ત્યાંથી નાસી છૂટયા હતા. આ મામલે ઇન્ફોસિટી પોલીસે ગુનો નોધી તપાસ શરૃ કરી છે.

ગાંધીનગરમાં બાઇક લઈને ફરતા રોડ રોમિયોનો ત્રાસ સતત વધી રહ્યો છે ચાલતી જઈ રહેલી મહિલાઓ હોય કે બસ સ્ટેન્ડ ઉપર ઊભેલી વિદ્યાર્થીનીઓ આ પ્રકારના રોમિયો તેમની છેડતી કરે છે પરંતુ બદનામીના ડરે યુવતીઓ ફરિયાદ નોંધાવતી નથી ત્યારે ગઈકાલે ગાંધીનગરના દંપતીને આવા જ રોમિયોનો કડવો અનુભવ થયો હતો. દંપતી અમદાવાદ કામ અર્થે ગયું હતું અને ત્યારબાદ બાઈક ઉપર ગાંધીનગર પરત ફરી રહ્યું હતું ત્યારે કોબા હાઇવે ઉપર ભાઈજીપુરા પાસે બાઈક ઉપર આવેલા બે શખ્સો પૈકી પાછળ બેઠેલા શખ્સે મહિલા સાથે અભદ્ર ઈશારાઓ કરીને તેણીનો દુપટ્ટો ખેંચ્યો હતો. જેના પગલે તેણે પતિને જાણ કરતાં તેમણે આ બાઈક સવાર શખ્સોને ઉભા રહેવા માટે કહ્યું હતું પરંતુ તેઓ બાઈક લઈને નાસી છૂટયા હતા. જેના પગલે આ દંપતિ તુરત જ ઇન્ફોસિટી પોલીસ સ્ટેશન પહોંચ્યું હતું અને બાઈકના નંબરના આધારે શખ્સો સામે છેડતીનો ગુનો દાખલ કરાવ્યો હતો. હાલ તો ઇન્ફોસિટી પોલીસે આ મામલે ગુનો દાખલ કરીને ફરાર થઈ ગયેલા શખ્સોની શોધખોળ માટે માથામાં શરૃ કરી છે અને આ વિસ્તારના સીસીટીવી ફૂટેજ પણ ચકાસવામાં આવી રહ્યા છે. ગાંધીનગરમાં આ પ્રકારની ઘટનાઓને અંજામ આપનાર આવા રોમિયો સામે કડક હાથે કામ લેવાની જરૃરિયાત લાગી રહી છે.