વડોદરામાં ઉંડેરાની જૂની સ્કૂલમાં પરપ્રાંતીય યુવકની ઘાતકી હત્યા

Murder in Vadodara : વડોદરાના ઉંડેરા વિસ્તારમાં હત્યાનો બનાવ બનતા ઉચ્ચ પોલીસ અધિકારીઓ દોડી ગયા હતા અને યુવકના મૃતદેહને પોસ્ટ મોર્ટમ અંગે સિવિલ હોસ્પિટલમાં લઈ જવાની તજવીજ કરી હતી. 

ઉંડેરા વિસ્તારમાં આવેલા કૈલાશ નગરમાં જૂની ગાયત્રી વિદ્યાલયમાં હાલમાં લોકો ભાડે થી રહે છે. આ સ્થળે રહેતા ધીરજ સુરેશ દાસ નામના યુવકની તીક્ષણ હથિયારના ઘા ઝીંકી હત્યા કરવામાં આવી હોવાનો બનાવ બનતા ભારે ચકચાર વ્યાપી હતી.

બનાવને પગલે ઉચ્ચ પોલીસ અધિકારીઓ તેમજ ક્રાઈમ બ્રાન્ચની ટીમ દોડી આવી હતી અને સ્થાનિક રહીશોની પૂછપરછ કરી હતી. પ્રાથમિક તબક્કે મિત્રએ જ મિત્રની હત્યા કરી હોવાનું જાણવા મળ્યું છે. 

પોલીસ આસપાસના રહેવાસીઓને પોલીસ સ્ટેશનને લઈ જઈ હત્યાનું કારણ જાણવા તેમજ મૃતક યુવકની વધુ વિગતો જાણવા માટે પૂછપરછ કરી રહી છે.

હત્યા કરનાર આયુષ મરનારનો રૂમ પાર્ટનર હતો અને જમવા બાબતે તકરાર થતાં તેણે છાતીમાં ચાકુ ચલાવી દેતા ધીરજ દાસનું મોત નીપજ્યું હતું. હત્યા કર્યા બાદ આરોપી ફરાર થઈ જાય તે પહેલા એક્સપ્રેસ વે પરથી તેને ઝડપી પાડવામાં આવ્યો હતો.