નવાયાર્ડ વિસ્તારમાં ટેમ્પો ચાલક પર ચાર ભાઇઓનો હિંસક હુમલો,ટેમ્પોની તોડફોડ

વડોદરાઃ નવાયાર્ડ વિસ્તારમાં ટેમ્પો ચાલક પર હિંસક હુમલો કરવામાં આવ્યો હોવાનો બનાવ બનતાં પોલીસે ચાર ભાઇઓ સામે ગુનો નોંધ્યો છે.

ગોરવાના મધુનગર પાસે અલિફ હાઇટ્સ ખાતે રહેતા બાસીદઅલી પઠાણે પોલીસને કહ્યું છે કે,મારા પિતા ટેમ્પો ચલાવી શાકભાજીની વર્દી કરે છે.આજે સવારે તેઓ ટેમ્પો લઇને ઘરતરફ આવી રહ્યા હતા ત્યારે આશાપુરી આલા હજરત ચોક ખાતે આસિફ અલી મો.અમીનખાન પઠાણ તેમજ તેના ત્રણ ભાઇઓ જાવેદઅલી,વાજીદ (બંને રહે.આલા હજરત ચોક પાસે)આસિફઅલી(રસુલજીની ચાલ,નવાયાર્ડ) અને સૈફઅલી(અલ મરહબા એપાર્ટમેન્ટ,ગોરવા)અગાઉથી જ દંડા અને પાઇપ સાથે સજ્જ થઇને તૂટી પડયા હતા.

મારા પિતાને હાથે,પગે અને માથામાં ઇજા થઇ હતી તેમજ ટેમ્પોના કાચ પણ તોડી નાંખ્યા હતા.અમારે હુમલાખોરો સાથે અગાઉ ઝઘડો થયો હોવાથી તેની અદાવત રાખી હુમલો કર્યો હતો.ફતેગંજ પોલીસે આ અંગે ગુનો નોંધ્યો છે.