માઈક્રોસોફ્ટના સ્થાપક બિલ ગેટસ આજે સ્ટેચ્યૂ ઓફ યુનિટિની મુલાકાત લેશે

વડોદરાઃ માઈક્રોસોફ્ટના સ્થાપક બિલ ગેટસ હાલમાં ભારતના પ્રવાસે છે.આવતીકાલે, શુક્રવારે તેઓ સ્ટેચ્યૂ ઓફ યુનિટિની મુલાકાત લેવાના હોવાની વિગતો જાણવા મળી છે.

જોકે તેમની આ મુલાકાતને લઈને બહુ ઓછી જાણકારી વડોદરા એરપોર્ટ અને સ્ટેચ્યૂ ઓફ યુનિટિના સત્તાધીશોને પણ પૂરી પાડવામાં આવી છે.મળતી વિગતો પ્રમાણે આવતીકાલે, શુક્રવારે સવારે બિલ ગેટસ પોતાના પ્રાઈવેટ જેટ મારફતે વડોદરા એરપોર્ટ આવશે અને પ્રાઈવેટ હેલિકોપ્ટર મારફતે સીધા સ્ટેચ્યૂ ઓફ યુનિટિજવા માટે રવાના થશે.

બપોરે ૧ થી ૩ દરમિયાન તેઓ  સ્ટેચ્યૂ ઓફ યુનિટિ  અને આરોગ્ય વનની મુલાકાત લેશે.તેમની સાથે ગુજરાત સરકારના ઉદ્યોગ અને પ્રોટોકલ મંત્રી જગદીશ વિશ્વકર્મા હાજર રહેશે.સૂત્રોનુ કહેવુ છે કે, આ દરમિયાન અન્ય કોઈને પણ અહીંયા એન્ટ્રી આપવામાં નહીં આવે.એ પછી તેઓ વડોદરા એરપોર્ટ પાછા ફરીને જામનગર ખાતે જવા રવાના થશે.તેઓ ઉદ્યોગપતિ મુકેશ અંબાણીના પુત્ર અનંત અબાણીના લગ્ન પ્રસંગ નિમિત્તેના કાર્યક્રમમાં હાજરી આપશે.