બોચાસણ બ્રીજ ઉપર ટ્રેક્ટરની દાંતીની ટક્કરે બાઇકચાલકનું મોત

વાસદ-બગોદરા હાઈવે પર બનેલો બનાવ

આણંદ: આણંદ જિલ્લામાંથી પસાર થતા વાસદ-બગોદરા સ્ટેટ હાઈવે પર આવેલ બોચાસણ ગામના બ્રીજ ઉપર ટ્રેક્ટરની દાંતીની ટક્કર વાગતા સર્જાયેલ અકસ્માતમાં મોટરસાયકલ પર સવાર એક વ્યક્તિનું કરુણ મોત નિપજ્યું હતું. જ્યારે અન્ય વ્યક્તિને ઈજાઓ પહોંચતા સારવાર અર્થે નજીકની હોસ્પિટલમાં ખસેડાયો હતો.   વડદલા ગામે રહેતા કાંતીભાઈ બાબરભાઈ ઠાકોર તથા તેઓના પિતરાઈ ભાઈ રાવજીભાઈ ચતુરભાઈ ઠાકોર ગત રોજ મોટરસાયકલ લઈ વહેરા ગામે રહેતા બનેવીને ત્યાં માતાજીનો પ્રસંગ હોઈ હાજરી આપવા જવા નીકળ્યા હતા. 

દરમ્યાન તેઓનું મોટરસાયકલ સાંજના સુમારે વાસદ-બગોદરા સ્ટેટ હાઈવે ઉપર આવેલ બોચાસણ ગામના બ્રીજ ઉપરથી પસાર થઈ રહ્યું હતું ત્યારે આગળ જઈ રહેલ ટ્રેક્ટરને ઓવરટેક કરવા જતા ટ્રેક્ટરના ચાલકે ટ્રેક્ટર દબાવ્યું હતું પરંતુ સામેથી વાહન આવતું હોઈ ટ્રેક્ટરના ચાલકે ટ્રેક્ટર સાઈડ પર દબાવતા પાછળ લગાવેલી દાંતીની ટક્કર મોટરસાયકલને વાગી હતી. 

જેથી મોટરસાયકલ પર સવાર બંને શખ્સો રસ્તા ઉપર પટકાયા હતા અને માથા તેમજ શરીરના અન્ય ભાગોએ ગંભીર ઈજાઓ પહોંચી હતી. અકસ્માતમાં ઘવાયેલા રાવજીભાઈનું સારવાર મળે તે પહેલા જ મૃત્યુ થયું હતું જ્યારે કાંતીભાઈને શરીરે વધતા ઓછા પ્રમાણમાં ઈજાઓ પહોંચતા ૧૦૮ મારફતે સારવાર અર્થે નજીકની હોસ્પિટલમાં ખસેડાયા હતા.