આબુમાં યુવકને સળગાવી દેવાનો પ્રયાસ કરનાર આરોપી અને બે સગીર સાગરિત સાથે વડોદરામાં પકડાયો

વડોદરાઃ માઉન્ટ આબુમાં બે દિવસ પહેલાં યુવકની હત્યા કરવાના પ્રયાસના બનેલા બનાવ અંગે રાજસ્થાન પોલીસે વડોદરાના ફતેગંજ વિસ્તારમાંથી ત્રણ યુવકોને ઝડપી પાડયા છે.

બનાવની પ્રાથમિક વિગતો મુજબ,આબુ ખાતે બે દિવસ પહેલાં રાત્રિના સમયે મહેન્દ્ર અને તેના મિત્રો સાથે ચા પીવા ગયો હતો ત્યારે દિલિપ ઉર્ફે રાજુ સાથે કોઇ કારણસર રકઝક થઇ હતી.જેથી દિલિપે તેને સળગાવી દેવાની ધમકી આપી હતી.ત્યારબાદ દિલિપે પેટ્રોલ છાંટીને આગ ચાંપી દેતાં યુવકને ગંભીર ઇજા થઇ હતી.હાલમાં તેની સારવાર ચાલી રહી છે.

આબુ પોલીસે આ અંગે હત્યાના પ્રયાસનો ગુનો નોંધી ટેકનિકલ સર્વેલન્સથી આરોપીઓની તપાસ કરતાં વડોદરાના ફતેગંજ વિસ્તારમાં તેમનું લોકેશન મળી આવ્યું હતું.જેથી રાજસ્થાન પોલીસે સયાજીગંજ પોલીસની મદદ લઇ લોકેશનને આધારે એક મકાનમાં તપાસ કરતાં ત્રણેય જણા પકડાઇ ગયા હતા.