કરમાલીયાપુરા ગામે કાંસા રિસોર્ટમાં અકસ્માતમાં વડોદરાનો યુવાન ઇજાગ્રસ્ત

વડોદરા, તા.18 વાઘોડિયા તાલુકાના કરમાલીયાપુરા ગામે આવેલા કાંસા પેરેડાઇઝ રિસોર્ટમાં એટીવી ફોર વ્હીલ મોટરસાઇકલની સ્પીડ અચાનક વધી જતાં ઝાડ સાથે અથડાતા અકસ્માત સર્જાયો હતો. વ્હિકલની મઝા માણતા વડોદરાના યુવાનને ઇજા થતાં સારવાર માટે ખસેડાયો છે.

આ અંગેની વિગત એવી છે કે શહેરના ખોડિયારનગર વિસ્તારમાં રુદ્રાક્ષ રિવેરામાં રહેતો સંજય લક્ષ્મણદાસ ખાનાણી (ઉ.વ.૨૭) પરિવારના અન્ય સભ્યો સાથે વડોદરા-આજવારોડ પર આવેલા ચંપાલીયાપુરા ગામની સીમમાં કાંસા પેરેડાઇઝ રિસોર્ટમાં ગયા  હતાં. સાંજના સમયે સંજય એટીવી (ઓલ ટેરેઇન વ્હિકલ) ફોર વ્હિલ મોટર સાઇકલની મઝા માણવા માટે અંદર બેઠો હતો. તેઓ એટીવી મોટરસાઇકલ રાઇડ કરતા હતા ત્યારે અચાનક તેની સ્પીડ વધી જતાં ઝાડ સાથે અથડાઇ હતી અને સંજય નીચે પડી જતાં શરીરમાં ઇજાઓ થતાં તેને સારવાર માટે ખસેડાયો છે.

આ અંગે વિજય હરિશ ખાનાણીએ વાઘોડિયા પોલીસમાં ફરિયાદ આપી હતી. તેમણે કહ્યું હતું કે અમો જ્યારે એટીવી મોટરસાઇકલ પર બેઠા ત્યારે શરૃઆતમાં તે ચાલતું જ ન હતું અને તેને બ્રેક પણ ન હતી એટલું જ નહી પરંતુ સેફ્ટી માટે હેલ્મેટ સહિતના સાધનો પણ અમને આપવામાં આવ્યા ન હતાં. કાંસા રિસોર્ટનો સંપર્ક કરતાં  ત્યાંના અધિકારીએ જણાવ્યું હતું કે અમને આ બાબતે કોઇ માહિતી નથી.