બે બાઇક સામસામે ભટકાતા બે યુવાનના કરૃણ મોત

વડોદરા,તા.12 વાઘોડિયા તાલુકાના સાંગાડોલ ગામ પાસે ગઇ સાંજે બે બાઇક સામસામે ધડાકાભેર ભટકાતા નોકરી પરથી છૂટીને ઘેર જતા એક યુવાન સહિત બેના કરૃણ મોત નિપજ્યા હતાં.

આ અંગેની વિગત એવી છે કે વાઘોડિયા તાલુકાના વેડપુર ગામમાં મંદિરવાળા ફળિયામાં રહેતો નિલેશ રતનસિંહ ચૌહાણ (ઉ.વ.૩૬) મઢેલી ખાતેની ખાનગી કંપનીમાં નોકરી કરતો હતો. ગઇ સાંજે તે નોકરી પરથી છૂટીને બાઇક પર ઘેર પરત જતો હતો. સાંજના સાડા છ વાગ્યાની આસપાસ તે સાંગાડોલ ગામથી થોડે દૂર ગોરજ જતા રોડ પરથી પસાર થતો હતો ત્યારે સામેથી એક બાઇક પૂરઝડપે આવી હતી અને ધડાકાભેર નિલેશની બાઇક સાથે અથડાતા બંને બાઇકના ફૂરચા થઇ ગયા  હતાં અને બંને બાઇક પર બેસેલા યુવાનો રોડ પર ફંગોળાયા હતાં.

આ ગમખ્વાર અકસ્માતમાં નિલેશનું કરૃણ મોત નિપજ્યું  હતું જ્યારે બીજી બાઇક પર બેસેલા બે યુવાન પૈકી સાંડાડોલ ગામના રાજેન્દ્રસિંહ મકવાણાનું પણ મોત થયું હતું અને અન્ય એક યુવાનને ઇજા થતાં સારવાર માટે ખસેડાયો હતો. આ બનાવ અંગે વાધોડિયા પોલીસે અકસ્માતનો ગુનો દાખલ કરી કાયદેસરની કાર્યવાહી હાથ ધરી હતી.