દાંડિયા બજાર રોડ પર ટ્રકની અડફેટે યુવકનું ઘટના સ્થળે જ મોત

 વડોદરા,નોકરીથી છૂટીને ઘરે જતા યુવાનને દાંડિયાબજાર રોડ પર આયશર ટ્રકના ચાલકે અડફેટમાં લેતા ઘટના સ્થળે જ તેનું મોત થયું હતું. જે અંગે તેમના પત્નીએ રાવપુરા  પોલીસ સ્ટેશનમાં  ફરિયાદ નોંધાવી છે.

આજવા રોડ નવજીવન જાદવ અમી શ્રદ્ધા સોસાયટી નજીક શિવ એપાર્ટમેન્ટમાં રહેતા કિશનભાઇ દલપતભાઇ ઝાલા (ઉં.વ.૩૬) ફોર વ્હીલરના શો રૃમમાં નોકરી કરે છે.ગઇકાલે સવારે તેઓ મોપેડ લઇને નોકરી ગયા હતા. રાતે ૧૦ વાગ્યે તેઓ નોકરીથી છૂટીને ઘરે પરત આવતા હતા. તે દરમિયાન દાંડિયાબજાર કોંગ્રેસ કાર્યાલય નજીક એક આયશર ટ્રકના ચાલકે તેઓને ટક્કર મારતા ગંભીર ઇજા થતા ઘટના સ્થળે જ તેઓનું મોત નિપજ્યું હતું. સ્થળ પર  હાજર લોકોએ એક શખ્સને પકડીને પોલીસને સોંપ્યો હતો. પરંતુ, તે શખ્સ અકસ્માત કરનાર ટ્રકનો ડ્રાઇવર નહીં હોવાનું તપાસ દરમિયાન જાણવા મળ્યું હતું. ટ્રક પર અમદાવાદ મ્યુનિસિપલ કોર્પોરેશન લખ્યું હતું. રાવપુરા પોલીસે ગુનો દાખલ કરી ભાગી ગયેલા ટ્રક ડ્રાઇવરની શોધખોળ હાથ ધરી છે.