નવી બસની ચેસિસનો વીડિયો ઉતારતો યુવક પગ લપસતા નીચે પટકાતા મોત

 વડોદરા,નવી ખરીદેલી બસની ચેસિસનો વીડિયો ઉતારતા યુવકનો પગ લપસતા તે ચેસિસ નીચે આવી જતા કચડાઇ ગયો હતો. જે અંગે કપુરાઇ પોલીસે કાયદેસરની કાર્યવાહી હાથ ધરી છે. 

સુરત પાસોદરા વિસ્તારની જે.બી.ડાયમંડ સ્કૂલની પાસે સૌરાષ્ટ્ર ટાઉનશિપમાં રહેતો દર્શન ભરતભાઇ રાવ  ગઇકાલે તેના મિત્ર જયમાલભાઇ ઓડેદરાની  બસની ખાલી ચેસિસની ડિલિવરી લેવા માટે વડોદરા આવ્યો હતો. બપોરે વડોદરા નજીકના દશરથ ગામેથી ખાલી ચેસિસ લઇને દર્શન, અતુલ મકરાણી, મેહુલ મહેતા, રાજદીપસિંહ ઝાલા તથા મનુભાઇ ભાળકીયા જાંબુવા ખાતે આવેલા બોડી બનાવવાના કારખાને આવવા નીકળ્યા હતા. તે સમયે સાંજે સાડા પાંચ વાગ્યે અમદાવાદથી સુરત જતા રોડ પર જાંબુવા બ્રિજ બાયપાસ નજીક દર્શન બસની ચેસિસનો વીડિયો ઉતારતો હતો. બસની આગળ જતા સમયે તેનો પગ લપસતા તેના પર ટાયર ફરી વળતા ગંભીર ઇજા થઇ હતી. તેને સારવાર માટે  સયાજી હોસ્પિટલમાં લઇ જવામાં આવ્યો હતો. પરંતુ, ટૂંકી સારવાર દરમિયાન તેનું મોત થયું હતું.