વડોદરામાં રિક્ષામાં આવી સિનિયર સિટિઝનોને લૂંટતી ગેંગની મહિલા લીડર ઝડપાઇ,આઠ ચેન મળી

વડોદરાઃ વડોદરામાં રિક્ષામાં આવી મુસાફરના સ્વાંગમાં સિનિયર સિટિઝનોને લૂંટતી ગેંગની મહિલા લીડરને પોલીસે ઝડપી પાડી મંગળસૂત્ર અને સોનાની ચેન કબજે કરી છે.

વડોદરામાં રિક્ષામાં મુસાફરી કરતા સિનિયર સિટિઝનોની સાથે પેસેન્જર તરીકે બેસી વાતોમાં પરોવીને દાગીના લૂંટી લેવાના બનાવો બનતાં ક્રાઇમ બ્રાન્ચની ટીમે સીસીટીવી ફૂટેજ અને ટેકનિકલ સર્વેલન્સના આધારે મહેમદાવાદથી રિક્ષા અને સ્કૂટર લઇને આવતી ગેંગના પાંચ સાગરીતોને ઝડપી પાડયા હતા.

તમામ આરોપીઓની પૂછપરછ દરમિયાન ટોળકી મહેમદાવાદ નજીક એક ભૂવાને મળ્યા બાદ વડોદરા આવતી હોવાની અને ટોળકી સાથે સ્કૂટર પર બે સાગરીતો પણ આવતા હોવાની વિગતો ખૂલી હતી.આ બે સાગરીતો રિક્ષામાં લૂંટેલો માલ લઇને ફરાર થઇ જતા હતા.જેથી પોલીસ ફૂટેજ તપાસે તો પણ કાંઇ હાથ લાગતું નહતું.

આરોપીઓની તપાસ દરમિયાન ગેંગની લીડર તરીકે ગીતા શૈલેષભાઇ વાઘેલા (દંતાણી)(કુંભારખાડ,મહેમદાવાદ)હોવાનું ખૂલતાં પોલીસે તેને પણ ઝડપી પાડી છે.મુસાફરોને વાતોમાં પરોવીને દાગીના કાઢી લેવામાં મુખ્ય ભૂમિકા ભજવતી ગીતા ગેંગની લીડર હોવાની વિગતો બહાર આવી છે.પોલીસે તેની પાસેથી મંગળસૂત્ર,ચેન મળી રૃ.સાડા પાંચ લાખની કિંમતના આઠ દાગીના કબજે લીધા છે.